Rijmbijbel

Hits in document:
2
author:
Maerlant, Jacob van
title:
Rijmbijbel
source:
Rijmb.
yearTo:
1285
fromInputFile:
4000.xml
yearFrom:
1285
idno:
corpusgysseling.4000

3:1 Vader soene helech gheest
3:2 Enich god sonder beghin
3:3 Ghef mj hulpe ende wlleest
3:4 Ende gratie in mjnen sijn
3:5 Dat hic vinde moghe word
3:6 Scone ende rime goed
3:7 Daer hic bi moghe bringhen vord
3:8 dat leget in minen moet
3:9 Marie moeder der genaden
3:10 Moeder der ontfarmecheit
3:11 Ghi hebt den meneghen beraden
3:12 Ghetroest van sire serecheit
3:13 helpt mi vrouwe met vre bede
3:14 dat hic ghewinne den eleghen gheest
3:15 die mi cracht ende moghentede
3:16 verlééne. dat mach mi helpen meest
3:17 So bem ic danne onuervaert
3:18 vraie rjme te bringhene vord
3:19 van ere gesten die ic begard
3:20 hebbe. te ontbindene jn dietsche word
3:21 Scolastica willic ontbinden
3:22 Jn dietsche word vten latine
3:23 Vrouwe nu moeti hu bewinden
3:24 troest te sine in mjne pine.
3:25 Nv merct die hier an sult léésen
3:26 wat nutscepe dat hier an sal wesen
3:27 hier ne vint men no fauele no borde
3:28 No ghene truffe no faloerde
3:29 Maer vraie rime ende ware woerd
3:30 hoe dat die tiit es comen voerd
3:31 Sint dat die werelt erst begonde
3:32 al tote dien dat quam die stonde
3:33 dat ihesus xpristus te hemele clam
3:34 die onse mensceit ane nam
3:35 hier vindic rime dachcortinghe
3:36 ende daer toe ware leeringhe
3:37 der noten gheliict dese ystorie
3:38 dat meerct wel in huwe memorie
3:39 die buten bitter heft die slume
3:40 die scale so art dat mense cume
3:41 Metten tanden mach ghewinnen
3:42 Maer al die soeteit die es binnen
3:43 die bittereit van deser geste
3:44 dats dat die vroetste ende die meeste
3:45 van lancheit dit ghegronden cume
4:1 dits de bittereit van der slume
4:2 die artheit die leghet an die scale
4:3 dats dat niemen al te male
4:4 Mach verstaen wat die wort dieden
4:5 die soeteit der af dats dat den lieden
4:6 die recht verstaen ende recht minnen
4:7 Ende wareit ende goet bekinnen
4:8 dat hem die woert so soete smaken
4:9 omme dat sii sin van waren saken
4:10 dat sise gherne horen leesen
4:11 Want daer ne mach ghen verlies an weesen
4:12 Hoert hier oe god die weerelt stichte
4:13 den troen metten sterren verlichte
4:14 die lucht metten voeghelen vercierde
4:15 die vissche int water visierde
4:16 die erde vercierde metten dieren
4:17 Ende met cruden van manieren
4:18 ende oe hi tachterst maecte den mensche
4:19 doe hi hem alle die wensche
4:20 adde ghemaect die hem bedursten
4:21 Maer nu suldi sonder vursten
4:22 Gode met mi bidden mede
4:23 dat hi mi dor dese warede
4:24 die hic dichte van siere weet
4:25 vergheue dat hic mi besmet
4:26 hebbe in luegheliken saken
4:27 die mi die lichteit dede maken
4:28 vander herten ende van den sinne
4:29 Ende die weerelike dinghe
4:30 Ende hi die nideghe verdue
4:31 die altoes versch siin ende nue
4:32 Ende talre stont daer toe gherust
4:33 dat hem te begripene lust
4:34 Min ghedichte ende mine word
4:35 Ghi nideghe merct ende hord
4:36 Ghi ne sult mi niet ghedeeren connen
4:37 al te spade hebdis begonnen
4:38 hets dompeit dat ghi vertert
4:39 hu nijt dinct mi dat niemene deert
4:40 dan hu seluen in huen siin
4:41 Ghi hebt die meer suareit der in
4:42 Ghi siit te magher ende te bleker
4:43 tui si di voer den oghen smeker
5:1 ende bachten valsch alse uerrader
5:2 Met judase moet ghiis alle gader
5:3 hebt hu den nijt hic wille dichten
5:4 ende mi der mede verlichten
5:5 dor min segghen dor min castien
5:6 Sone suldiis niet vertien
5:7 dies wille ghaen an min beghin
5:8 Nu god verclare minen siin
5:9 Merct hic wille ghis seker siit
5:10 dits beghin van alre tiit
5:11 God die maecte int beghin
5:12 Den hemel ende oec mede der in
5:13 Alle die inghelike nature
5:14 Desen hemel heet die scrifture
5:15 Empireus in rechter name
5:16 daer die inghele hare beghin in namen
5:17 ende hi maecte die erde mede
5:18 Wi verstaen al hier ter stede
5:19 daer die lettere die erde noemnt
5:20 dat met hare materien compt
5:21 al dat bi der erden leuet
5:22 ende al die dinc die soe vte gheuet
5:23 Ende weder in hare kert
5:24 dies weest oec wijs ende gheleert
5:25 die materie van allen dieren
5:26 van allen cruden van manieren
5:27 van boemen. van adams vlesche mede
5:28 brochte soe voer hare daer ter stede
5:29 Maer niet ne maketse god noch toe
5:30 hier namaels maect hise ende hoert hoe
5:31 die viere elemente. water. vier.
5:32 Erde. lucht. die waren hier
5:33 Ghemaect al daer men die erde noemnt
5:34 nu merct oe die redene compt
5:35 Werelt ende tiit siin euen out
5:36 dus sprect die wareit onse behout
5:37 van nieute maecte god int beghin
5:38 den emel ende die jnghele der in
5:39 Ende die andre elemente mede
5:40 die erde was van hare scoenede
5:41 Nochtoe deelloes na der nature
5:42 dies heetse jdel die scrifture
5:43 Ende met deemstereden bedect
5:44 die scrifture die vertrect
5:45 dat die eleghe gheest ons heren
6:1 dats gods wille dus salment keeren
6:2 die wart up water ghedraghen
6:3 dies woerds mach ons wel behaghen
6:4 daer wart betekent ende bediet
6:5 dat doepsel dat men nu pliet.
6:6 DOe maecte god met sinen worde
6:7 dat lecht alse hict bescriuen hoerde
6:8 dwoerd gods dats die soene
6:9 die ons verloeste dats die goene
6:10 die vlesch in marien ontfinc
6:11 dat lecht her die sonne up ghinc
6:12 was een suerc claer ende scone
6:13 Gheliic der dagheraet anden trone
6:14 der sonnen onghelic van lechte
6:15 al dus bescriuen ons gods knechte
6:16 doe sach got dat lecht was goet
6:17 Ende versciet daer metter spoet
6:18 dat lecht van der deemsterhede
6:19 al hier verstaen wi teser stede
6:20 dat lucifer ende sine scare
6:21 versceden worden openbare
6:22 Omme hare ouerdeghe sonden
6:23 van den jnghelen die wlstonden
6:24 diere staende bleuen heet die boec dlecht
6:25 Ende diere vielen na al recht
6:26 Moghen wel heeten demsterede
6:27 daer noemde god dus léést men mede
6:28 dat lecht bi namen ende hiet dach
6:29 die tiit daer deemsterede ane lach
6:30 hiet onse here nacht bi namen
6:31 Ende dit was alse wi vernamen
6:32 Een sondach ende dalreste dach
6:33 die ter weerelt oint ghelach
6:34 Des ander daghes dus eist bekent
6:35 Maecte god dat firmament
6:36 Jnt water ter middewarde recht
6:37 van watere so maecte hi echt
6:38 hart ende vast gheliic kerstale
6:39 Claer ghescepen alse dei scale
6:40 Die sterren dit es bekent
6:41 Die staen in dit firmament
6:42 firmament hetet bi namen.
6:43 Omme da hem vaste hout te samen
7:1 Ende het die watre alsoe hout
7:2 Die bouen hem siin met ghewoud
7:3 dat sii niet ne commen nééder
7:4 wat sii daer doen antwordic weeder
7:5 dat ne weet niemene dan god ons here
7:6 Sonder dat sulc in sine leere
7:7 Seghet dat die dau danen coemt
7:8 dit firmament heuet hi ghenoemt
7:9 Spreket die boec hemel bi namen
7:10 Omme dat beaect al te samen
7:11 Ende verhemelt die weerelt al
7:12 Water. vier. berch ende dal.
7:13 DEn derdendaghe leese wi van gode
7:14 dat hi met sinen ghebode
7:15 dwater uersaemde in een couent
7:16 dat es onder tfirmament
7:17 dat hare die droecheit openbaerde
7:18 die droecheit noemde god doe harde
7:19 Ende des waters versaminghen
7:20 daer sii alle te samene ghinghen
7:21 dat hiet hi bi namen zee
7:22 Ende daer naer so maecte hi mee
7:23 God besach dat het was goet
7:24 Ende hi seide metter spoet
7:25 hic wille di gheuen cruut
7:26 Ende hare groeneit comme vt.
7:27 daer af comen moeghe saet
7:28 Ende datter gheboemte up staet
7:29 dat appelle draghe na siere maniere
7:30 Ende vrucht oec meneghertiere
7:31 al dat hi seide was wl daen
7:32 Want siin wille moeste wlgaen
7:33 DEen vierdendaghe macte der ane
7:34 Onse here sonne ende mane
7:35 Ende die sterren die hi ghesent
7:36 Ende gheseet heft int firmament
7:37 verre beneden sterren staen
7:38 Sonne ende mane sonder waen
7:39 Ende alle die planééten mede
7:40 derde heft de nederste stede
7:41 van al den sterren. ende als hic wane
7:42 Ende alse men leesende vint de mane
8:1 es de minste van den sterren
8:2 die ons lichten noch van verren
8:3 die vroede liede segghen al bloet
8:4 die sonne achtwaruen alse groet
8:5 alse die erde es al gheheel
8:6 Ende die mane es meerre een deel
8:7 dan die erde dus eist bescreuen
8:8 Mane ende sterren siin ghegheuen
8:9 dat sii dien naect maken clare
8:10 want hi anders te leeliic ware
8:11 Ende omme dat die nachts in watere pinen
8:12 Ende die oec wandelen in wostinen
8:13 daer bi souden ghetroest weesen
8:14 Ende alre meest oec alse wi leesen
8:15 van libien int groete sant
8:16 daer een clene wint alte hant
8:17 die weghe verwait soe dat se man
8:18 altoes neghen bekennen can
8:19 Ne daden die sterren men ne vonde
8:20 Niemene diere gheghaen in conde
8:21 Noch men ne vonde nemmermee
8:22 Niemene die voere in de zee
8:23 Oec leesmen dat men voghele vint
8:24 die vander sonnen niet en tuint
8:25 Die clareit ghedoghen connen
8:26 Nachts moetsi vlieghen ende ronnen
8:27 Ende hem bi den sterren voeden
8:28 dat suldi mede wel ghevroeden
8:29 dat niet alleene dor die sconeede
8:30 Noch allene dort leecht mede
8:31 Sonne. sterre. ende mane.
8:32 Sijn gheseet. maer om te verstane
8:33 Scone weder ende quaet der bi
8:34 Ende om dat die minste des vroet sii
8:35 dat si sceden dach ende nacht
8:36 Weke ende maent ende dees jaers cracht
8:37 lentin. somer. heerfst. ende winter.
8:38 die van dompeiden ghenen splinter
8:39 Stekende heeft in sinen siin
8:40 die magher vele leeren in
8:41 versta wi so merken conne
8:42 dat ghemaect was die sonne
8:43 Jnt oesten tilike te haren up ganghe
9:1 des auons der na. dan was niet langhe
9:2 doe soe was ten onderen gane
9:3 Maecte god risende de mane
9:4 Ende soe was wl van haren lechte
9:5 dus proeuent mesters al bi rechte
9:6 DEs .v. daghes versierde god ons here
9:7 water ende lucht. met groeter ere
9:8 Der lucht gaf hi dat vlieghen conde
9:9 Ende dat suemmende ghinc ten gronde
9:10 vissche en voghele dat es waer
9:11 Maecte hi beede van watre daer
9:12 God maecte alle dinc die roet
9:13 Clene ende groet diet water voet
9:14 Ende wat so gaet oec ende vlieghet
9:15 bedi mesdoet hi ende lieghet
9:16 die seghet dat sij iet maken conden
9:17 die quade gheeste dane sonden
9:18 doe seinde hise ende benedide
9:19 Om dat hi wilde dat siin wille diide
9:20 DEn sesten daghe versierde god
9:21 De erde ende hiet na siin ghebod
9:22 dat soe beesten brochte voerd
9:23 hi wiste wel merct ende hoert
9:24 dat de mensche vallen soude
9:25 maer doer sine dueghet so woude
9:26 hi den mensche beesten gheuen
9:27 Omme te verlichtene dat suare leeuen
9:28 beesten merct dit wordelike saen
9:29 het si om dat sii ons bi staen
9:30 Nv vraegt men of die goedertiere
9:31 God. maecte die felle diere
9:32 Ende de gheueninde voer adaems sonden
9:33 die redene hebbic al vonden
9:34 dat alle diere sonder waen
9:35 Ghemaect waren onderdan
9:36 den mensche te sine emmermeere
9:37 adde hi gheoert na onsen here
9:38 Maer na de mesdaet alst wel sciint
9:39 word sii fel ende gheueniint
9:40 Ende staende na siine scade
9:41 Oec mede om siine mesdade
9:42 Segghen ons die eleghe lude
9:43 dat die boeme ende die crude
9:44 die nu wassen vruchte loes
9:45 dat elc siine cracht verloes
10:1 van der mesdaet van adame
10:2 Sonne ende mane van groeter scame
10:3 Sterren ende diere steene
10:4 Ne behilden nemmeer alleene
10:5 van hare cracht dan zeeuende deel
10:6 te voeren adden sii se al gheel.
10:7 DOe sprac god make wi den man
10:8 Nu merct ende verstaet hier an
10:9 tote wien seide hi maken wie
10:10 der persone so siin drie
10:11 de drieuoudecheit spreect ghemeene
10:12 dits den mensche ene here niet cleene
10:13 dattene god makede met voerrade
10:14 al maecti met siire ghenade
10:15 al de andre creaturen
10:16 hine sprac niet van hare naturen
10:17 alse hi tote des menschen dede
10:18 Nochtan was hi ghemaket mede
10:19 Na der zielen des gods ghebelde
10:20 dit was den mensche groete welde
10:21 Na den lichame wildit horen
10:22 heft hiis vele te voren
10:23 want hi es van meester werden
10:24 den besten staet dat oeft ter erden
10:25 Ende den mensche te hemele waert
10:26 Jn drien saken openbaert
10:27 God des menschen weerdechede
10:28 dat hi niet alleene mede
10:29 Ghemaect was omme hertsche welde
10:30 Maer na der zielen gods ghebelde
10:31 Dander es als ic erst seide
10:32 datter god sinen raet toe leide
10:33 Ende seide maken wi den man
10:34 de derde waerdecheit der an
10:35 dats dat hi ghemaect was alse here
10:36 van allen dieren met groeter ere
10:37 dat sine voeden na den sonden
10:38 Ende cleden souden tallen stonden
10:39 Ende helpen sinen arbeit draghen
10:40 vor de mesdaet hoer ic ghewaghen
10:41 Gaf god den mensche ende den dieren
10:42 vruucht tetene van manieren
10:43 want derde brochte niet dan goet
11:1 Mensche marc of du bes vroet
11:2 du heues verloren in den meesten
11:3 dine herscap in den besten
11:4 an draken ende an liebarde
11:5 an tigren ende an luparde
11:6 dit was groete waerdechede
11:7 an die mintste hef stu mede
11:8 Ghewelt verloren om diin lieghen
11:9 dats an messien ende an vlieghen
11:10 an die middelste hefstu ghewout
11:11 om dat tu marken sout
11:12 dattu here altoes wars bleuen
11:13 der beesten atstu niet begheuen
11:14 tgebod dat di god gheboet
11:15 dus vielstu in groeter noet
11:16 God benedide den man
11:17 ende seide deese woert der an
11:18 wasset ende wert menech vout
11:19 dit woert dat men ghescreuen hout
11:20 Gaet jeghen die buggheren die spraken
11:21 valschelike in haren traken
11:22 dat huwelic te gherestonde
11:23 Ne mach weesen sonder sonde
11:24 die daet waent hem weert suaer pardoen
11:25 God en hiet noint sonde doen
11:26 God sach al dat hi adde ghemaect
11:27 al waest goet ende wel gheraect
11:28 Uulmaect es nu hemel ende erde
11:29 Ende al hare sierheit met groeter werde
11:30 Des .vi. daghes verwldi mede
11:31 al werc daer hi neerenst toe dede
11:32 Ende ruste up den .vij. dach
11:33 Niet dat hem eneghe pine verwach
11:34 Maer dat hi siin maken liet
11:35 Jn sulken ne market niet
11:36 hine maect noch alle daghe
11:37 vele dincs dins ghene saghe
11:38 Maer hine maecte niet hier na
11:39 Sine materie die ne was daer
11:40 Ghemaect of hare ghelike
11:41 an adame was sekerlike
11:42 die materie van alden lieden
11:43 dit willic an siin vlesch bedieden
12:1 van sinen vlessche esset al
12:2 dat es ende was ende commen sal
12:3 Ende mensche voerme heuet ontfaen
12:4 van der zielen suldi verstaen
12:5 dat daer ghene ziele af cam
12:6 Maer wie so vlesch van hem nam
12:7 God gaf hem ziele ghelic adame
12:8 de zeuende dach die heet die name
12:9 daer god up ruste saterdach
12:10 Ende in ebreus eist alse ict sach
12:11 heetent die iueden sabaet
12:12 dats ruste gods daert al ane staet
12:13 [ende] [hi] [benedidene] [dats] [waer]
12:14 Sint vierdemenne menech jaer
12:15 Duus alse ghiit hier hebt vernomen
12:16 So eist ons van Moysesse comen
12:17 dat got maecte hemel ende erde
12:18 Ende al dat boerde thare werde
12:19 al benediide hiit ende seinde
12:20 dit was eer dat noint reinde
12:21 want eene fontejne van groeten prijse
12:22 die quam uten paradyse
12:23 gaf natheit in groeter tiit
12:24 al omme ende omme der weerelt
12:25 tparadys bediet marien
12:26 de fonteine ihesus den vrien
12:27 die al met duegeden maket nat
12:28 hier naer sal hict verclaren bat
12:29 wat riiuieren der ute quamen
12:30 Ende oe dat sii heeten bi namen
12:31 hoert van adame dat besceet
12:32 God maectene alse hier voren steet
12:33 van der herden van den lime
12:34 Na den vlesche eist dat ic riime
12:35 Ende die ziele maecti van niete
12:36 weet weel dat hi achter liete
12:37 de wareit die niet gheloueden dies
12:38 de lettre spreect dat hi in blies
12:39 hem den leuenliken gheest
12:40 dat bediet recht alre meest
12:41 dat hi die ziele sende in vat
12:42 plato dolde in deeser stat
13:1 die edelste clerc van ogher name
13:2 die seide dat ten lachame
13:3 die inghele maecten ende god den gheest
13:4 dat segghen sulke hebbe ic ghevreest
13:5 dat de ziele ware meede
13:6 ghemaect vander goddeliichede
13:7 ware dat waer sone mochte dan
13:8 Niet ghene sonde doen de man
13:9 Niechtemeer dan onse here
13:10 Noch oec steruen nemmermeere
13:11 DE man was ghemaect vander moude
13:12 dat merct. recht in manliker oude
13:13 wlcommen in crachte in wlre jueghet
13:14 wl maect van leeden jn sulker dueghet
13:15 wilde hi tghebot gods niet begheuen
13:16 dat hi mochte eweelike leuen
13:17 verbrake hiit oec doer eneghe noet
13:18 Dat hire omme smaken soude de doet
13:19 Duus was hem wl wille ghegheuen
13:20 Weder hi steruen wilde ofte leeuen
13:21 God die milde es ende wiis
13:22 die maecte dat paradys
13:23 ten derden daghe doe hi
13:24 vt Comen dede bome ende cruut
13:25 al daer die weerelt es an beghin
13:26 dat es ten oesten no meer no min
13:27 al daer heuet hiit gheseet
13:28 het bescriuet die heleghe weet
13:29 dat et es die scoenste stede
13:30 die es onder den emel mede
13:31 beede bi berghen ende bi landen
13:32 vte onser wanderinghen ghestanden
13:33 Jof so gheuest metter zee
13:34 dat man ne ghewonne nemmermee
13:35 Noch ne gheen came in de stede
13:36 Met neghere bendechede
13:37 het was toter manen oech
13:38 Bedi bleeft vander loeuien droech
13:39 Jnt paradys sette onse here god
13:40 alt hout want het was siin ghebod
13:41 dat scone was ende smaken soechte
13:42 omme dat den man ghenoeghen mochte
13:43 bede de smake ende dat up sien
13:44 jn die middewarde van dien
13:45 sette hi des leeuens hout
14:1 dat heuet die cracht ende die ghewout
14:2 die de vruucht et soe mach hem gheuen
14:3 ghesonde ende langhe leeuen
14:4 Oec segghen sulke boeke meer
14:5 dat hi mach leuen emmermeer
14:6 bedi sette hi oec der binnen
14:7 den boem die goet ende quaet leert kinnen
14:8 dat heuet bedi de name ontfaen
14:9 Om dat doe adaem adde mesdaen
14:10 daer an dat hi maecte tquade
14:11 ende van den goeden vel in scade
14:12 de fontejne daer ic er af liet
14:13 die dor dat paradys al vliet
14:14 Gaf al den boemen saeps ghenoech
14:15 [ende] [al] [der] [plaetchen] [int] [gheuoech]
14:16 die deelt haer daer in vieren riuieren
14:17 de namen salic u visieren
14:18 fisons. ende ganges eet die eene
14:19 die lopet endi duere alleene
14:20 men vint gout in hare sant
14:21 tdbeste dat es in enech lant
14:22 Gion of nilus comnt ghelopen
14:23 dor dat lant van ethyopen
14:24 al dus eet dandre riuiere
14:25 tygris de derde. eufrates. dits viere
14:26 dicken vallen sie in de erde
14:27 dat si lopen hare verde
14:28 Ende springhen vte eere andre stad
14:29 die boeke bescriuen ons dat
14:30 God droech den mensche van der erde
14:31 dat hine adde ghemaect werde
14:32 jnt paradys om dat hi woude
14:33 dat hi der in werken soude
14:34 Niet der in pinen dor de noet
14:35 Maer ghenoechte hebben groet
14:36 Ende dattene god soude wachten mede
14:37 Ende zee . man die eleghe stede
14:38 Gods ghebot hem wildit weeten
14:39 van alre vruucht soe soutu eeten
14:40 Sonder die es an den boem
14:41 Die goets ende quaets leert neemen goem
15:1 vp wat daghe dat dur af eets
15:2 Sprac got hic wille dat tud weets
15:3 Dan soutu daer naer steruelic wesen
15:4 Doe seide god te ant na deesen
15:5 dat de mensche weesen moet
15:6 alleene dan nees niet goet
15:7 make wi hem oec bedi
15:8 hulpe die hem gheliic sii
15:9 Ende met dien so brochte god
15:10 voer adame na siin ghebod
15:11 alle voghele metten dieren
15:12 van lichte van lande van riuieren
15:13 Ende al dat men vint in der zee
15:14 Omme tue saken ende nemmee
15:15 dat hise noumen soude daer
15:16 Ende hi weeten soude voer waer
15:17 dat siin gheliic na den lechame
15:18 No der sielen daer niet ne came
15:19 daer gaf hem doe adaem de ionghe
15:20 name na ebreusche tonghe
15:21 die deerste was van allen spraken
15:22 doe deede god na deesen saken
15:23 Eenen slaep comen in adame
15:24 al heuet die dinc slapens name
15:25 het was al onmachte van sinne
15:26 daer wi gheloeuen dat hi jnne
15:27 die emelsche bliscepe vernam
15:28 want dat eersten doe hi bequam
15:29 profetiseerde hi segghen clerke
15:30 van ihesus ende van der elegher kerke
15:31 Ende voerseide der loeuien ganc
15:32 Ende doemesdach te voeren lanc
15:33 dat hi met brande soude comen
15:34 dit seidi siinen kindren somen
15:35 jn deesen slape te deeser stede
15:36 Nam god eene rebbe ende vlesch der meede
15:37 Ende maectere af .j. wiif alleene
15:38 vlesch van vlesche been van beene
15:39 Ende setteese voer adame
15:40 dat hi hare gheuen soude name
15:41 hi sprac dit vlesch ende dit been
15:42 es van den minen ende al een
15:43 virago sal mense noemen
16:1 dat luut van manne comen
16:2 aldus hiet soe voer de sonden
16:3 maer daer naer in corten stonden
16:4 doe soe de sonde adde ghedaen
16:5 so hiet hise. eua. saen
16:6 dat woert mach men dus bedieden
16:7 dat soe was moeder al der lieden
16:8 alst kint ter weerelt comet vt
16:9 So es des cnapelins eerste luut
16:10 .a. ende des meiskins .e.
16:11 dit ne faeiliert nemmermee
16:12 doe adaem dwijf adde ghenant
16:13 profeterde hi alte ant
16:14 Omme dat soe es van minen liue
16:15 sal de man volghen siinen wiue
16:16 moeder ende vader begheuen
16:17 Ende daer naer so es bescreuen
16:18 jn eenen vlesch sulsi tue weesen
16:19 huwelic voerseide hi na desen
16:20 doe eua ende adaem waren ghemaect
16:21 waren si bedegader naect
16:22 Ende sine scaemden hem niet
16:23 Maerct dat men dit an kindren siet
16:24 sine scamen hem niet eer entujnt
16:25 Eer hare nature sonden kint
16:26 dus waest van euen ende van adame
16:27 dat sii waren sonder scame
16:28 Tien stonden ende ter seluer vren
16:29 was van allen creaturen
16:30 dat verstaet van allen beesten
16:31 tserpent lustech na der geesten
16:32 Ende scalc oec van sinne
16:33 want de dieuel wasser jnne
16:34 want doe lucifer die scone
16:35 wart gheworpen van den trone
16:36 adde hiis niit in alre wiis
16:37 dat adaem was int paradiis
16:38 Ende pensde oe hine vt dade steeken
16:39 dade hi hem tghebod gods breken
16:40 so moesti huut pensde hi dan
16:41 maer dat hi ontsach den man
16:42 des ghinc hi eerst toten wiue
16:43 Omme dat soe cranker was van liue
17:1 metten serpente heuet hiit bestaen
17:2 want dat soe plach doe sonder waen
17:3 up ende neder recht te gane
17:4 recht na des menschen ghedane
17:5 beda scriuet die clerc was diere
17:6 het was een serpents maniere
17:7 Gheansicht alse .i. joncvrouwe
17:8 vte hem sprac die onghetrouwe
17:9 alse hi nu doet wildit weeten
17:10 vte dien die hi heuet beseeten
17:11 Ende hi seide dat ghebot
17:12 waer omme so gaeft v god
17:13 dat ghi van al den houte ghemeene
17:14 Nut sonder van eenen alleene
17:15 dit vraghede hi want na hare antworde
17:16 soe visierde hi sine moerde
17:17 soe sprac omme dat wi bi auenturen
17:18 die doet niet ne souden besuren
17:19 alsoe bi auenturen seide.
17:20 maercte hi wel hare crancheide.
17:21 dat soe vaste niet ne ghelouede
17:22 Ende seide ut des serpents hoeuede
17:23 No ghine bliifter niet omme doet
17:24 maer hi weet wel die here groet
17:25 so weltiit so ghire of hebt gheeten
17:26 so suldi vroeden ende weeten
17:27 vroescap alse of ghi god waert
17:28 Eua waert veruaert
17:29 want soe gode waende gheliken
17:30 soe sach den scoenen boem den riken
17:31 Ende die vrucht scoene ende sochte
17:32 soe at dat soe sider becochte
17:33 Ende boet adame haren man
17:34 die messchien merken beghan
17:35 dat soe te ant niet ne bleef doet
17:36 Nochtanne wisti wel al bloet
17:37 wat quade der af soude comen
17:38 dus eist bescreuen van hem somen
17:39 Ende hi at wat sore af soude ghescien
17:40 hare oghen ontdaden mettien
17:41 Niet dat si blent adden ghewesen
17:42 Maer hare lust verroerde met deesen
18:1 jn die naturlike leede
18:2 dat soe te voeren niet ne dede
18:3 Ende begonnen hem beden scamen
18:4 van hare naecter mesquamen
18:5 Doe naemsi bede gader
18:6 met haren rade vighe blader
18:7 Ende gordense om hare scamelike lede
18:8 dus decten si hare scameliichede
18:9 daer si saten onder die rijse
18:10 hoerden sii in den paradise
18:11 Gode wandelen daer hi quam
18:12 die sprac waer bestu adam
18:13 here seide hi doe hic adde verstaen
18:14 dine stemme vervardic mi saen
18:15 Ende hebbe mi ghedecht dor das
18:16 Omme dat hic naect was
18:17 God sprac wie heft di dat ghewiiset
18:18 Sonder dattu di ghespiset
18:19 heues met dat ic di verboet
18:20 doe sprac adaem dulheit groet
18:21 alse of hi gode sine mesdaet
18:22 wilde tijen ende siin quaet
18:23 dwijf dattu mi gaues sprac hi
18:24 Gaeft mi ende ic aet bedi
18:25 alse of hi meende het ware bleuen
18:26 Ne hadstuse mi niet ghegheuen
18:27 doe sprac god te hare dies at
18:28 waer omme so datstu dat
18:29 doe teegt ieue den serpente
18:30 maer van alden parlemente
18:31 droech hare meeninghe van der tale
18:32 gode te tiene al te male
18:33 dat adaem van der reinder herde
18:34 was ghemaect van groeter werde
18:35 die nie smerte ne adde ontfaen
18:36 No oec niet ne was ondaen
18:37 No met ploeghen no met spaden
18:38 No besmet met ghere ondaden
18:39 betekende de reine marie
18:40 die sonder eneghe dorpernie
18:41 hare reine vlesch in reinen liue
18:42 Niet alse pleghen andre wiue
18:43 jhesuse droech oec ende wan
19:1 Onbesmet van andren man
19:2 Gheliker wis oec dat adam
19:3 des .vi. daghes ter weerelt cam
19:4 also wart jhesus onse troest vercoren
19:5 jn der .vi. ewen gheboren
19:6 den serpente vraghede hi niet
19:7 buten sinen rade eist ghesciet
19:8 want bi des duuels rade cament al
19:9 doe vloecti als hic scriuen sal
19:10 want hiis ant serpent began
19:11 Ende leide hem drie vloeke an
19:12 Omme dat in drien mesdede
19:13 Eersten in die nidechede
19:14 ander waerf omme dat heet loech
19:15 danderwaerf omme dat den man bedroech
19:16 des waest al dus vermalendiit
19:17 het adde omme smenschen oecheit niit
19:18 bedi so seide god aldus saen
19:19 vp dine borst so sulstu gaen
19:20 van loghenen sloecht god in den mont
19:21 ende sprac du sult talre stont
19:22 erde heeten in diin leeuen
19:23 dat lut dat hem was ghegheuen
19:24 nam hem god al daer ter stede
19:25 Ende gaf den monde venijn mede
19:26 van hoenten at eenen godtsat
19:27 jc sal sprac god al daer ter stat
19:28 viantsceep setten sonder bliif
19:29 tusschen di ende dwijf
19:30 soe sal up diin oeft treden
19:31 ende du sult oec talre steden
19:32 hare ende hare gheslachte laghen
19:33 deese woerde mach men draghen
19:34 tote der moeder gods marien
19:35 die den duuel met sire partien
19:36 altoes duinghet ende jaghet
19:37 al eist dat hi hare saghet
19:38 Hecht alse die man doet ende pine
19:39 ontfaet van serpents venine
19:40 alsoe mach smenschen nuchterne spu
19:41 dat serpent doden segghic. v
19:42 Omme dat sii beede naket waren
19:43 So vliet noch serpent te waren
20:1 den naecten mensche waer hi ghecleet
20:2 so soutene veninen ghereet
20:3 jn tuen saken so mesdede dwijf
20:4 soe was hoeuerdech int liif
20:5 bedi settese emmermeer god
20:6 te sine onder des mans ghebot
20:7 Omme dat soe at verbodene spise
20:8 dat becocht soe in sulker wise
20:9 dat soe met rouwen tskints gheneest
20:10 omme den apel daer men af leest
20:11 Omme dat adaem in eere wise
20:12 alleene mesdede an de spise
20:13 des neert hem noch met arbeide
20:14 de man in bossche ende in der heide
20:15 die herde was gheuloect ghenoech
20:16 omme dat soe die vrucht droech
20:17 des draegse noch in onsen coerne
20:18 bede destelle ende doerne
20:19 Doe maecte god yeuen ende adame
20:20 omme te deckene hare scame
20:21 tue rocke van beesten vellen
20:22 dat meendire mede alse wi tellen
20:23 dit decsel es van doeden dieren
20:24 Ende du best steruelic van manieren
20:25 doe sprac god nu es adaem ghemaect
20:26 als een van ons wiis gheraect
20:27 dit was gheliic als in een spot
20:28 omme dat hi wilde weesen got
20:29 Omme dat hi vrailike weet
20:30 quaets ende goets ondersceet
20:31 Nu stectene vte den paradyse
20:32 dat hi niet ete der spise
20:33 die es an dat lignum vite
20:34 Ende hi dan leue emmerme
20:35 Ende dit ne daer hu wondren niet
20:36 dat dit van den houte ghesciet
20:37 want sulc eylant es onder den dach
20:38 daer gheen mensche in steruen mach
20:39 jnt lant van serres waest dat seghic .v.
20:40 eene dinc ane boeme ende es ru
20:41 daer men mede langhet tliif
20:42 Ende alexander sonder bliif
20:43 Screef tote aristotiles
20:44 datter vele volcs jn es
20:45 die langhe leueden vtermaten
21:1 Omme dat sii van der vruucht aten
21:2 God stakene vten paradyse
21:3 Om dat hi soude na dorpers wise
21:4 deerde oefenen daer hi te voeren
21:5 Of was ghemaect nu suldi hoeren
21:6 van wat lande hi ghemaect was
21:7 vten lande van damas
21:8 daer bi waren sii hij ende sijn wijf
21:9 bede bedoluen na hare lijf
21:10 jn spelunca duplici
21:11 also noemt die bible mj
21:12 jn dien acker sloech also wel
21:13 Caym sinen broeder abel
21:14 voert paradys sette onse here
21:15 Cherubyn die den duuel keere
21:16 dat hire nemmermeer in vaert
21:17 die adde oec .i. vierin suaert
21:18 dat vier den wech den man bename
21:19 datter neghen in ne came
21:20 dat suert es kerende ghenant
21:21 hen es el niet dan een brant
21:22 een vierin mur diet omme geet
21:23 bedi eist dat ment kerende eet
21:24 dat god dan wel doen mochte
21:25 weltiit dat hem goet dochte
21:26 het was een stic wech alte samen
21:27 doere enoch ende helyas in quamen
21:28 Maer dat bloet dat sindent liep
21:29 vt ons heren wonden diep
21:30 jn siere passien deet al vt
21:31 dies essere meneghe saleghe brut
21:32 van gods aluen siider in comen
21:33 die haren loen heuet ghenomen
21:34 Moyses die ouer liit
21:35 cortelike adaems tiit
21:36 Ende der kinder die hi wan
21:37 Maer siident was .j. helech man
21:38 Metodius .j. martelare
21:39 daer hi was ghevanghen suare
21:40 jn enen karkere bat hi seere
21:41 dat hem vertoghen soude onse heere
21:42 de weerelt ende hare beghin
21:43 die eleghe ghest hi brochtem jn
22:1 dat adam met sinen wiue
22:2 maghet met onbesmetten liue
22:3 vte den paradyse cam hare
22:4 Ende hem te sinen .xv.den jare
22:5 gheboren wart siin sone caym
22:6 Ende calmana sin suster met him
22:7 Ouer .xv. jaer also wel
22:8 wart daer naer gheboren abel
22:9 Ende syn suster delbora
22:10 doe adam was out der na
22:11 .C. jaer ende .xxx. also wel
22:12 vermoerde caym den goeden abel
22:13 doe bewendene adam ende yeue
22:14 .C. jaer dor sine lieue
22:15 doe hi was out .cc. jaer
22:16 Ende .xxx. weet wel voer waer
22:17 wan hi sinen soene zeed
22:18 Nemmermeer ne noemtene de weet
22:19 kinder ghewonnen bi sinen liue
22:20 dan alleene dese viue
22:21 Maer men wilt wanen ende weten
22:22 datter vele siin vergheten
22:23 hoert hier der redenen ghenoech
22:24 tui caym abelle versloech
22:25 Caym was van herten vrec
22:26 bedi viel hi in duuels strec
22:27 Ende wan coeren
22:28 in die ghelike dat hi wilde wesen rike
22:29 abel die hilt scaep in den sande
22:30 doe souden sii doen hare offrande
22:31 daer brochte caym siin dulste coeren
22:32 abel brochte gode te voeren
22:33 van sinen scapen dat vetste lam
22:34 Om dat die gifte gode bequam
22:35 Cam tfier van gode onder sine hande
22:36 Ende verterde sine offrande
22:37 Maer cayme ne gheuielt niet so
22:38 des was hi droeue ende onvroe
22:39 Ende ledde sinen broeder abelle
22:40 jn dien acker als die felle
22:41 al daer hine der omme moerde
22:42 doe sprac god te hem dese worde
22:43 Caym waer es abel din broeder
23:1 Niet in dien god ne was vroeder
23:2 te wetene waer hi was ghevaren
23:3 Ende oec wiste hi die moert te waren
23:4 Maer caym wilde als een quaet
23:5 decken sinen wle daet
23:6 Ende seide hine wiste niet van den broeder
23:7 bem ic sprac hi vam hem hoeder
23:8 mettien onse here seghet
23:9 Sin bloet dat up derde leghet
23:10 roept van der erden ane mj
23:11 vermalendit bestu bedi
23:12 vluchtech ende onghestade na deesen
23:13 Soutu up der erden weesen
23:14 Caym die in wanopen vel
23:15 Sprac nu weetic arde wel
23:16 dat merre es vele mine sonde
23:17 dat hic emmermeer ghebetren conde
23:18 wie so mi vint sal mi verslaen
23:19 Neen sprac god soe saelt niet gaen
23:20 dit sprac hi in derre maniere
23:21 alse of hi seide dune sterfs niet sciere
23:22 Maer so wie so cayme vermoert
23:23 Soe verstaet men dese word
23:24 Ende quit van der keitiuechede
23:25 hem beoerter dit toe mede
23:26 Seuen vout sal hit becopen
23:27 dat meende god die tiit sal loepen
23:28 tote den zeuenden eer die caytiif
23:29 Emmer verliest siin lijf
23:30 Want lamech galt hem sine pine
23:31 die was die seuende na cayme
23:32 God teekendene daer ter stede
23:33 jnt hoeft metter jechtechede
23:34 dat men daer bi liete te liue
23:35 doe vloe hi och met sinen wiue
23:36 ten oesten waert dat wanen wj
23:37 dit was al daer dat nu es endi
23:38 Caym die bediet de jueden
23:39 die wle vaelsce rueden
23:40 jhesus kerst was hare broeder
23:41 Na den vlesche want siin moeder
23:42 Marie waser af gheboren
23:43 alse die rose wast up den doeren
24:1 om sine duegt waer si hem fel
24:2 also was caym abel
24:3 Si crustene ende laetse leuende
24:4 Ende gheliic alse caym beuende
24:5 jnt houet was dat wi daer bi
24:6 van doetslane liete vri
24:7 also siin de iueden mede
24:8 gheteekint an hare manlichede
24:9 dat mense leuende sal laten
24:10 dat men sal sien dat sii verwaten
24:11 van gode siin ende versceden
24:12 hen es weeder no kerstin no eedin
24:13 hine laetse onder hem leuen
24:14 Omme den chens die si hem gheuen
24:15 Onder hare viande oudensii tliif
24:16 recht alse caym die caytiif
24:17 Onghestadech ende onwert
24:18 Was hi ende bloet ende veruaert
24:19 aldus es dat juetsche diet
24:20 Ghine wetse gheeruet niet
24:21 Maer dolende van lande te lande
24:22 leuen sii onder hare viande
24:23 jn wanopen siin met allen
24:24 Recht alse caym gheuallen
24:25 Cayms wiif hiet calmana
24:26 die droech hem .j. zoene der na
24:27 Enoch hiet hine ende na dat
24:28 So maecti .j. niewe stat
24:29 die hiet hi alse siin zoene hiet
24:30 hier mach men merken diet besiet
24:31 dat vele liede doe waren mede
24:32 die hem holpen maken die stede
24:33 al siin sii onghenoemnt bleuen
24:34 josephus die heeft bescreuen
24:35 dat caym roefde in sine stat
24:36 Ende leerde siinen lieden dat
24:37 Ende onthilt hem in sine stede
24:38 hi was dalre eerste mede
24:39 diet lant delde ende veste poert
24:40 ghierecheit leerde hem die moert
24:41 Enoc siin sone wan jrad
24:42 Ende jrad die wan na dat
24:43 Eenen soene hiet manideel
25:1 de goene wan matusael
25:2 die matusael die wan
25:3 lamech dat was een recht quaet man
25:4 hi was die seuende van adam
25:5 Ende deerste die tue wiif nam
25:6 dus dedi oerdoem an de wet
25:7 want god in deerste ade gheseet
25:8 dat sii tue. man ende wijf
25:9 waren een vlesch ende .j. liif
25:10 hine seide niet .j. man neemer tue
25:11 lamech achtets no min no mee
25:12 Oda ende cella hieten sine wiue
25:13 Oda wan jabel binnen sinen liue
25:14 hi was deerste in die wostinen
25:15 jn herden maniere leerde pinen
25:16 hi maecte eerst herden pawelioene
25:17 die si moghen te haren doene
25:18 van der weide in dandre draghen
25:19 hi sciet die beesten ende dede jaghen
25:20 de scaep binnen eere stede
25:21 Ende de ghete teere andre mede
25:22 jubal was siin broeder ghenant
25:23 hi was die musike vant
25:24 Ende omme dat hi adde hoeren ghewaghen
25:25 adame van .ij. doemesdaghen
25:26 Eenen van watre. ende eenen van viere
25:27 visierde hi in derre maniere
25:28 dat musike behouden bleue
25:29 dat hi in .ij. colummen screue
25:30 Sine const in .j. ardine
25:31 Ende in eene maerberine
25:32 Of tvier came dat die erde
25:33 hare der naer openbaerde
25:34 Of duater came de maerberine
25:35 bleue gheeel na der pine
25:36 Cella wan tubalcaim
25:37 eerst was gheuisiert bi him
25:38 Smeden ende de behendechede
25:39 an sine hamere leestmen mede
25:40 dat jubal vant jn haren luut
25:41 van musiken groet den duut
25:42 tubalcaimus suster neonia
26:1 die visierde oec der na
26:2 harde meneghertiere weeuen
26:3 dus eist van deesen bescreuen
26:4 Lamech alse scriuet josephus
26:5 was seere vroet ende sprac aldus
26:6 hoert mine woert bede lamechs wiif
26:7 hic hebbe ghenomen siin lijf
26:8 Met mire wonde eenen man
26:9 Ende ic hebbe doet der an
26:10 Eenen jonghelinc in mire nidechede
26:11 van cayms moerdadechede
26:12 cam seuenuoudeghe wrake
26:13 Ende van lamechs quader sake
26:14 sal wrake siin .vii. ende lxx vout
26:15 dit voerseit die carel out
26:16 alse oft ghesciet ware ende hiit saghe
26:17 hi was gheuallen in de daghe
26:18 Ende adde verloren die oghen
26:19 Nochtanne scoet hi wel met boghen
26:20 Een cnape leeddene daer hi ghinc
26:21 Ende weltiit so hi hoerde dinc
26:22 die scoet hi al onghesien
26:23 Cayme hoerdi met dien
26:24 daer hi ruschede int wout
26:25 Ende scoetene doet me ghewout.
26:26 Ende alst hem seide de jonghelinc
26:27 sloech hi omme de selue dinc
26:28 dien met sinen boghe doet
26:29 hier af so cam wrake groet
26:30 si .lxxvii. die van hem quamen
26:31 die verdronken alte samen
26:32 jn de louie der naer
26:33 Ende sine wiif die waren hem suaer
26:34 al duere ende tuere al siin leuen
26:35 dus es die wrake up hem verheuen
26:36 Adam wan dus teelt de weet
26:37 eenen soene ende hietene zeet
26:38 Ende zet die wan dus eist ghesciet
26:39 eenen sone die enos hiet
26:40 dat was die eerste leest men mede
26:41 die te gode maecte ghebede
26:42 Ende aneriep ons heren name
26:43 Oec so leesmen van adame
27:1 dat hi adde xxx sonen
27:2 Ende xxx doctren sonder den gonen
27:3 abelle die caym versloech
27:4 dat becochte hi suaer ghenoech
27:5 zets sone enos die wan
27:6 heenen sone ende
27:7 Ende die wan daer naer also wel
27:8 eenen zone hiet malaleel
27:9 Malaleel die wan jaret
27:10 Ende daer naer dus eist gheset
27:11 so wan iaret enoch
27:12 eenen sone ende leuet noch
27:13 Enoch wan matusale
27:14 die wan lamec. lamec noe
27:15 Gheliker wis dat van cayme
27:16 alse ghit leest in deerre rime
27:17 de seuende was fel ende quaet
27:18 also was de seuende die staet
27:19 jn sets gheslachte enoch de beste
27:20 daer omme voerdene in sine veste
27:21 God. dats in dertsche paradys
27:22 Ende sal leuen maect men ons wiis
27:23 Met joien tote antkerst tijden
27:24 Ende jeghen hem striden
27:25 hi dien god sal vermalendien
27:26 Salne doet slaen ende helyen
27:27 DOe was van adame die .x.
27:28 die vele wardecheden verdienden
27:29 deerste ewe ende jn hem
27:30 daer ic seker aue bem
27:31 dat soe stont tve dusentech jaer
27:32 Ende tue ondert dat es waer
27:33 daer toe .xl. ende .iiii.
27:34 Noe wan die goedertiere
27:35 doe hi adde .v. ondert. jaer
27:36 drie sonen nu hoerter naer
27:37 hare namen siin dus gheset
27:38 Sem ende. cam. ende jafet
27:39 Moyses bescriuet mede
27:40 tui god die luuie comen dede
27:41 hi seide het waren vele liede
28:1 jn der tiit dat dat ghesciede
28:2 Ende die van zet waren comen
28:3 die wille hi gods kinder nomen
28:4 want si loueden wel alte samen
28:5 Ende die van cayme quamen
28:6 die hiet hi des menschen kinder
28:7 want hare duegheden waren minder
28:8 doe waren lieden van zeet comen
28:9 die cayms dochter adden vernomen
28:10 dat sii scone waren van liue
28:11 Ende namense bedi te wiue
28:12 Ende daer af camen gygante
28:13 Onghemate grote seriante
28:14 die onsen here niet ontsaghen
28:15 josephus scriuet dat doe laghen
28:16 bi den vrowen die quade gheeste
28:17 Ende daer af quamen die meeste
28:18 liede alse wi leesen hoeren
28:19 aldus wart meerlin gheboren
28:20 jn arturs boeke leest men dus.
28:21 Een goet man hiet medodius
28:22 die hem dor gode liet doet slaen
28:23 lach in eenen carker gheuaen
28:24 hi bat gode in sinen sijn
28:25 dat hi heme dat beghin
28:26 van erderike toghen wilde
28:27 Ende god hordene die milde
28:28 hi bescreef dat doe plaghen
28:29 die quade liede in dien daghen
28:30 te verkerne der naturen zeden
28:31 want si bouen ligghen deden
28:32 de vrouwen ende selue onder laghen
28:33 hier omme wildse onse here plaghen
28:34 Ende hiet noe maken die arke
28:35 die goet was van ghewarke
28:36 hare ghescelpen was aldus
28:37 lanc was soe .ccc. cubitus
28:38 Elc cubitus in geometrie
28:39 heft .ix. voete vrie
28:40 vijftech cubitus was soe oech
28:41 Scriift moyses dier niet omme en loech
28:42 xxx. cubitus was soe wijt
28:43 soe voerder up wart talre tijt
29:1 so soe emmer naude ende loec
29:2 jnt upperste so ne was soe oec
29:3 Maer .j. cubitus wijt ende lanc
29:4 Onder in den nedersten ganc
29:5 viercante ende bouen mede
29:6 Ghemaect met groeter behendecheden
29:7 .v. woninghen daer men in mochte wandren
29:8 deene woninghe bouen der andren
29:9 als ons bescriuet iosephus
29:10 beneden leese wiit aldus
29:11 was dar hare mes in vel
29:12 dar bouen was ghemaect wel
29:13 te houdene dat borde ter spise
29:14 daer bouen adde noe de wise
29:15 der bitender diere woenen ghemaect
29:16 bet up .j. ander stede staet
29:17 daer waren in de sochte beesten
29:18 jnt upperste so staet in der gesten
29:19 woenden die vogle ende tfolc mede
29:20 tusschen tuen cameren terre stede
29:21 tusschen den sochten creaturen
29:22 Ende den wreden was teere duren
29:23 een jnganc al daer ghemaect
29:24 God die tallen tiiden waect
29:25 deede van onsuueren dieren
29:26 tue der jn van elker manieren
29:27 van suueren dedi datter in camen
29:28 van elken doene .ij. te samen
29:29 Suuer heet mense die spletvoete siin
29:30 Ende bi naturen edeken pliin
29:31 dander eeten onsuuer weesen
29:32 Noe ghinc in na deesen
29:33 Sine .iiii sonen. ende hare .iiij. wiif
29:34 deese achte menschen behelden dliif
29:35 doe adde noe .dc. jaer
29:36 Ende in meie waest dats waer
29:37 des .xvii. daghes dat hire in ghinc
29:38 God die vorweet alle dinc
29:39 Sloet die duere toe van buten
29:40 Ende die adren ontsluten
29:41 van der erden ende water ute comen
29:42 dat meneghe tliif heft ghenomen
30:1 Ende god ontdede die suerke mede
30:2 Ende deet reinen sonder vrede
30:3 .xl. nachte. ende .xl. daghe
30:4 te voeren dan es ghene saghe
30:5 sone reinet clene no groet
30:6 darke hief up ende vloet
30:7 hoghe in de lucht wi lesent dus
30:8 dat water .xv. cubitus
30:9 bouen allen berghen oghe ghinc
30:10 dus verdranc al leuende dinc
30:11 Sonder die vissche nu merket dies
30:12 Ende al dat in der erden wies
30:13 die arke daer metten lieden
30:14 Noe in vloe die mach bedieden
30:15 Wel met redenen marien
30:16 dar god mede wilde vrien
30:17 die weerelt al van luciferre
30:18 die te marien hebben gherre
30:19 Ende al te male in hare vlien
30:20 hem mach altoes niet messchien
30:21 Noch hier no ten langhen liue
30:22 dus es soe darke daer die caitiue
30:23 jn varen ende dat liif ontdraghen
30:24 want soe oert elken mensche claghen
30:25 Aldus grod dans ghene saghe
30:26 was dwater .c½. daghe
30:27 daer naer leesmen dat heet waende
30:28 jn october in dier maende
30:29 vp den .vii.xx.sten dach
30:30 dat die arke daert volc in lach
30:31 vp de berghe van armenien
30:32 des oeric noch den boeken lien
30:33 dat men der of noch vint out
30:34 up die berghe dat seere es out
30:35 ten eersten daghe in januare
30:36 dat wi tbeghin noemen van den jare
30:37 leesmen dat eerst die berghe bleken
30:38 Noe ontdede oeric spreken
30:39 Eene veinstre die an die arke stoet
30:40 Ende liet vlieghen met der spoet
30:41 den roec die niet weeder ne cam
30:42 daer naer hi de duue nam
30:43 Ende lietse na den roeke vlieghen
31:1 sone vant waer rusten sonder lieghen
31:2 Ende beette up die arke neder
31:3 Na .vij. daghe sendise weder
31:4 doe troeste soe die caitiue
31:5 Met eenen telghe van eere oliue
31:6 dat soe ter arken nauonts brochte
31:7 doe was noe te moede sochte
31:8 die duue bediet onser vrouwen
31:9 die ter arken kerde met trouwen
31:10 Ende den telch van der oliuen
31:11 brochte ghedreghen den keitiuen
31:12 Oliue bediet pais ende vrede
31:13 wie so in der serechede
31:14 Ende in sonden es beuaen
31:15 laet hi sine harte an hare staen
31:16 Marie diene besuictene niet
31:17 soe brinct te paise siin verdriet
31:18 Ende maect hare kint te hem sochte
31:19 recht alse de duue doliue brochte
31:20 Echt naer .vij. daghe der naer
31:21 sendise vt dat es waer
31:22 alse hi adde ghedaen oec eer
31:23 Maer soe ne kerde nemmeer
31:24 Nu oert arde wel hier naer
31:25 doe noe adde adde .dc. jaer
31:26 Ende .j. der toe ten eersten daghe
31:27 van aprile dans ghene saghe
31:28 ondede noe dat suldi marken
31:29 bouen dat decsel van der arken
31:30 Ende sach dat de erde was ghedroeghet
31:31 Maer hi heuet hem ghedoghet
31:32 dat hi ute wilde niet
31:33 Eer dat hem ons here hiet
31:34 Maer doe hire adde in ghesiin .j. jaer
31:35 vp den seluen dach der naer
31:36 jn den meie ghinc hire vt
31:37 want got hiet hem ouer luut
31:38 bede hem ende al den dieren
31:39 Ende sprac in deser manieren
31:40 Wasset diet voert menechfout
31:41 Ende werct de erde met ghewout
31:42 DOe maecte noe .j. outaer
31:43 jn gods eere ende betaelde daer
32:1 Ende offerdere up van suueren dieren
32:2 Seuene van hare manieren
32:3 die berrende hi daer ter stede
32:4 daer toe dedise mede
32:5 dat die tue dinghe al te samen
32:6 Met soeter roke vor gode quamen
32:7 doe sprac god selue tote noe
32:8 hic ne vermalendie nemmermee
32:9 herderike om der liede leed
32:10 want si ten sonden siin ghereet
32:11 Saettijd. oest. dach ende nacht
32:12 des somers ende des winters cracht
32:13 die ne sullen rusten njet
32:14 Ende ghi menscelike diet
32:15 wasset ende weert menechfout
32:16 Ende vwe vreese ende hu ghewout
32:17 Si bouen allen andren dieren
32:18 jc gheue hu in derre manjeren
32:19 Orlof alrehande vlesch te etene
32:20 Maer dit doe hic v te weetene
32:21 dat hic manslacht verbiede
32:22 voer deese tijt segghen de liede
32:23 dat noint mensche vlesch en at
32:24 God gaf hem .j. teekin na dat
32:25 dat sij hem niet veruaerden seere
32:26 jeghen de louie nemmermeere
32:27 dat siet men in den reghenboghen
32:28 Noint ne saghene menschen oghen
32:29 dat weet hic weel voer deese dinghen
32:30 tue varwen heft hi sonderlinghe
32:31 Eenen van watre eenen van viere
32:32 troede dat es sine maniere
32:33 Es ons naerre dan dat bleeke
32:34 die dreeghet dus rike ende weke
32:35 al es de louie vergaen
32:36 Een vier sal comen sonder waen
32:37 daer niet voeren ghestaen en mach
32:38 dat weert de achterste doemesdach
32:39 Doe pijnde noe ter erden waert
32:40 Ende plante .j. wijngaert
32:41 daer hi tacterst wiin af dranc
32:42 Ende wart dronkin an sinen danc.
32:43 Ende bleef slapende up .j. dach.
33:1 Jnt huus dar hi wonens plach.
33:2 Naect lach hi tusschen sine been.
33:3 Menne plach doe broeke ne gheen.
33:4 Semirramis hebbic vernomen.
33:5 Die men sal hier achter nomen.
33:6 Was die erste broeke vant.
33:7 Cam noe sone altehant.
33:8 Dar die vader lach al bloet.
33:9 Ende maecter omme si lachghen groet.
33:10 Ende doet sinen broedren verstaen.
33:11 Die camen achter wart ghegaen.
33:12 Dat har ne gheen den vader sach.
33:13 Ende dectene dar hi lach.
33:14 Terst dat noe ontwake was.
33:15 Ende hi die warheit wiste das.
33:16 Dat hem sijn minste sone dede.
33:17 Vermaledidi dar ter stede.
33:18 Cams kint dat hiet canaan.
33:19 Vp sijn gheslachte leesmen so wan.
33:20 Tiuesche volc dat heleghe lant.
33:21 Aldus sloechse die suare bant.
33:22 Van den vloeke die noe gaf.
33:23 Sem dar camen die ioden af.
33:24 Was ghebenediet ende iafet.
33:25 Dat was omme dat si daden bet.
33:26 Cam bediet die quade ioden .
33:27 Die vule onreine rueden.
33:28 Cam die spotte doe hi sach.
33:29 Doe sijn vader naect lach.
33:30 Ende hi dronken lach van wine.
33:31 Jhesus was dronker van der pine.
33:32 Die hem die vule ioden daden.
33:33 Ende hi hinc naect sonder ghewaden.
33:34 An de cruce dor onse mesdaet.
33:35 Daer bespotten menich quaet.
33:36 Dar omme es tgheslachte algader.
33:37 Vermalediet als om den vader.
33:38 Canam sijn sone was.
33:39 Also als men hier voren las.
33:40 Alse noe hadde .dccc. iaer.
34:1 Ende .l. mede dat es waer.
34:2 Staerf hi als ter mensceit hord.
34:3 Josephus scriuet in sine word.
34:4 Dat niemene te spotte ne kere.
34:5 Tlanghe leuen van wilen ere.
34:6 Het cam om har grote dueghet.
34:7 Ende om dat ghi marken mueghet.
34:8 Dat si vonden astronomie.
34:9 Arismerike ende geometrie.
34:10 Ende andre conste mede vonden.
34:11 Die men niet in corten stonden.
34:12 Vinden mach segghen si te waren.
34:13 Hen ne si in .vij. hondert iaren.
34:14 Men mach ondervinden niet eer.
34:15 Der sterren ganc ende hare keer.
34:16 UAn desen noes kinder cam.
34:17 Sem. iaphet. ende cam.
34:18 Grod gheslachte hord.
34:19 Wat ic scriuen sal vort.
34:20 Van iaphet camere .x. ende viue.
34:21 Ende van camme .x. warf drie.
34:22 Ende van sem ghelouets mie.
34:23 Camer .x. ende seuene.
34:24 Suenen stoud ende starc van leuene.
34:25 Dit was .lxx. ende tve.
34:26 Dochter ne telt men no min no me.
34:27 Van desen volke sijn ontsponghen.
34:28 .Lxxij. manieren van tonghen.
34:29 Sems gheslachte hadde asia.
34:30 Cam egᨡpten ende affrica.
34:31 Japhet frigien ende europen.
34:32 Die tve gheslachten laten wi lopen.
34:33 Ende tellen mest van sem.
34:34 Vm dat marie cam van hem.
34:35 Mar cam wan enen sone hiet thus.
34:36 Van heme lesewijt al dus.
34:37 Dat hi wan nembord den gᨡgant.
34:38 Die word erst rouende tlant.
34:39 Ende erst here met mueghentheden.
34:40 Hi dede vier erst anebeden.
34:41 Mecodius die martelare.
35:1 Seghet van noe al openbare.
35:2 Dat hie na die louie wan.
35:3 Enen sone die goede man.
35:4 Jonicus was hi ghenant.
35:5 Etam gaf hi hem een lant.
35:6 God gaf desen groten sin.
35:7 Astronomie die nam beghin.
35:8 Van desen want hise vant.
35:9 Nembroed die cam in sijn lant.
35:10 Die gigant wie lesent dus.
35:11 Hi was lanc .x. cubitus.
35:12 Hie vernam ende leide an desen.
35:13 Hoe hi here soude wesen.
35:14 Jonicus die vorseide mede.
35:15 Dat cams kinder die moghenthede.
35:16 Erst souden hebben alse wijt horen.
35:17 Want belus was van hem gheboren.
35:18 Dar na soude sems gheslachte.
35:19 Die werelt duinghen met crachte.
35:20 Dat waren percen ende meden.
35:21 Die vele hadde moghenteden.
35:22 Dar na die van iafet camen.
35:23 Dat waren grieken alse wijt vernamen.
35:24 Ende die romeine die hare beduanc.
35:25 Hadden dur al die werelt lanc.
35:26 [Alst] [emmer] [moeste] [ghescien.]
35:27 [Noch] [mach] [ment] [heden] [daghes] [sien.]
35:28 [Dat] [alle] [die] [ghelouen] [in] [erderike.]
35:29 [Moeten] [sijn] [onderdaen] [den] [romscen] [rike.]
35:30 [Hier na] [sal] [men] [horen] [die] [spraken.]
35:31 [Hoe dat] [si] [onsen] [here] [wraken.]
35:32 Nembord wart van cams gheslachte.
35:33 Coning ende duancse onsachte.
35:34 Ouer sems gheslachte word heues man.
35:35 Ende sin ofcomende hiet iectam.
35:36 Susen die word here ghinder.
35:37 Ghemaect ouer iafets kinder.
35:38 Men vint boeke bescreuen.
35:39 Dat noch toe in noes leuen.
35:40 Waren .xxiiij. dusent man.
35:41 Ende dar toe .c. nochtan.
35:42 Sonder wijf ende sonder kinder.
36:1 Die si vele hadden ghinder.
36:2 NA noes doed maecten die heren.
36:3 Enen tor dar wi of leren.
36:4 So grod so wijt dat nu terstonde.
36:5 Niemen wel ghelouen conde.
36:6 Dar scietse god oude ende ionghe.
36:7 Ende gaf elken en tonghe.
36:8 Hier af cam dat weetmen wale.
36:9 Dat men vint so meneghe tale.
36:10 Sem wan een kint hiet arfaxat.
36:11 Na die louie nv merct dat.
36:12 Arfaxat die wan sale.
36:13 Die selue hadde namen tve.
36:14 Lucas hetene caᨡnan.
36:15 Die leest men dat heber wan.
36:16 Heber wan falech dar na.
36:17 Jn sinen tiden weet ouer waer.
36:18 Ghesciede twonder van den tonghen.
36:19 Falech wan ragu den ionghen.
36:20 Ragu wan sarug ghelouet das.
36:21 Dat in sinen tiden coninc was.
36:22 Belus van nembroeds gheslachte.
36:23 Die een deel wan oec met crachte.
36:24 Des lans van assaria.
36:25 Na sine doet so wan dar na.
36:26 Ninus sijn sone altemale.
36:27 Van desen ninus es die tale.
36:28 Dat hi was deerste orloghes man.
36:29 Van desen leesmen dat hi verwan.
36:30 Camme die noch niet was doed.
36:31 Ende in brachten was here groed.
36:32 Zoroastres hiet menne daer.
36:33 Touerie vant hi dats waer.
36:34 Ende de .vij. arten mede.
36:35 Leesemen dat hi graueren dede.
36:36 Jn .vij. colummen van metale.
36:37 Ende in .vij. ardine also wale.
36:38 Jeghen water ende brant.
36:39 Ninus sijn suare viant.
36:40 Verbarn sine boeke algader.
36:41 Ninus was der afgode vader.
36:42 Want doe belus doet was bleuen.
37:1 Heueti een beelde verheuen.
37:2 Na sinen vader dat hi eerde.
37:3 Wie so mesdaen adden ende bekerde.
37:4 Den beilde ende daer toe vloe.
37:5 Hine adde niet te scaden een stroe.
37:6 Om dat dese dinc ghesciede.
37:7 So hanebedent vele liede.
37:8 Die van calden dit vintmen hier.
37:9 Anebeden teerste vier.
37:10 Omme dat alle afgode verbrande.
37:11 Houtin coprin alre hande.
37:12 Die papen van canopen namen
37:13 Haren belus alle te samen.
37:14 Ende daden hem die crone of dor dat.
37:15 Ende setter vp een erdin vat.
37:16 Na eene crone maecten sijt.
37:17 Al vulgate waest ende niet wijt.
37:18 Ende daer was water in ghedaen.
37:19 Ghestopt met wasse sonder waen.
37:20 Ende settent in caldensen viere.
37:21 Dat was moeste smelten sciere.
37:22 Ende dat water vte den brand.
37:23 Dus behelt de hogher hand.
37:24 Belus afgod ende dus began.
37:25 Die dolinghe onder die nam.
37:26 Want die duvel spraket vt.
37:27 Jeghen die liede ouer lud.
37:28 SArug wan nator ende kinder maere.
37:29 Ende nachor die wan tare.
37:30 Thare wan abram der naer.
37:31 Do hi out was .lxx. iaer.
37:32 Ende noch .ij. zonen als ict vernam.
37:33 Enen nachor ende enen aram.
37:34 Die andre ewe nemt hier ende.
37:35 Ende abrame als ict verkende.
37:36 [Die] [hadde] [ghestaen] [weet] [vor waer.]
37:37 [.M. cc.ende .xcij.] [iaer.]
37:38 Aram die wan dus telmen mi.
37:39 Loch . melcham ende saraᨡ
37:40 Enen sone ende dochtre tve.
38:1 Do bleef hi doet dar na in calde.
38:2 Eer thare starf sijn vader.
38:3 Dar moghen noch die liede algader.
38:4 Heden bescouwen sijn graf.
38:5 Des was thare droeue der af.
38:6 Ende romder omme alsemen seghet.
38:7 Die stad dar hi begrauen leghet.
38:8 Hurso was ghenoemt die stede.
38:9 Want men hem oec cracht dardede.
38:10 Omme tfier dat men der anebede.
38:11 Sie wilden dat hit dade mede.
38:12 Dies rumdi tland droeue ende gram.
38:13 Met nachor ende met abram.
38:14 Sine tve sonen hi gheboet.
38:15 Arams dochter die was doet.
38:16 Dat sise te wiue nemen souden.
38:17 Het was wet doe men moest wel houden.
38:18 Nachor nam melca ende abram.
38:19 Nam saraᨡ als ict vernam.
38:20 Abram nam lots sijns broeder kint.
38:21 Omme hem dien hi adde ghemint.
38:22 Ende coessene te sinen sone.
38:23 Thare ghinc wech alse die gone.
38:24 Die was een godvructich man.
38:25 Ende wilde int land van canaan.
38:26 Hi quam ghegaen een stic der na.
38:27 Jnt lant van mesopotania.
38:28 Jn eene stede hiet carram.
38:29 Dar starf hi na dien dat hire cam.
38:30 Alse hi gheleuet hadde te desen liue.
38:31 .cc. jaer ende viue.
38:32 DOe sprac god dus tote abram.
38:33 Rume die stede van carram.
38:34 Land ende maghe nedre ende hoghe.
38:35 Ende com int lant daer ic di toghe.
38:36 Abram die voer wech bedi.
38:37 Met sinen wiue saraᨡ
38:38 Ende loch sin neue die ghinc mede.
38:39 Ende al dat hi wan in die stede.
38:40 Van carram voerde wech die man.
39:1 Ende cam int lant van canaan.
39:2 Hie ende sijn huwen met hem.
39:3 Tere stede heet sichem.
39:4 Jn die ewangelie so staet.
39:5 Dat die selue cichar heet.
39:6 Van danen cam hi ten edlen dale.
39:7 Dat nv eene. zee. es altemale.
39:8 Dar stonder in .v. citheide.
39:9 Jn elc een coning alse men seide.
39:10 Hier na suldis horen tale.
39:11 Dat lant verbrande god altemale.
39:12 Al vertoghede hem onse here.
39:13 Ende seide ic sal dor dine here.
39:14 Dijn gheslachte gheuen dit lant.
39:15 Daer maecte hi enen outaer te hant.
39:16 Van dane voer hi wonen el.
39:17 Tusschen .ay. ende betel.
39:18 Daer hi echt maecte .i. outaer.
39:19 Tote damas voer hi van daer.
39:20 Ende dar na word ongher al te hand.
39:21 Do voer hi in egᨡpten land.
39:22 Tien tiden was hi rike van goude.
39:23 Ende van besten menichuoude.
39:24 Van seluer van groter meisniede.
39:25 Hi maecte onder die egᨡpte liede.
39:26 Arstologie ende artrichmetike.
39:27 Dar af hebben si sekerlike.
39:28 Die grieke gheleerd ende ontfaen.
39:29 Van danen kerdi weder saen.
39:30 Tusschen betel ende aᨡ
39:31 Dar nv iherusalem es bi.
39:32 Dar sciet hi van sinen neue loth.
39:33 So rike hadse ghemaket god.
39:34 Van besten dat sie niet ne mochten.
39:35 Tesamen zin. hare herden vochten.
39:36 Deen vp den andren omme weide.
39:37 Loth voer wonen ten ghesceide.
39:38 Jn dat lant van zodoma.
39:39 Dat nv es water verre ende na.
39:40 Abram ne sciet ute landen niet.
39:41 Dat god sinen afcomen behiet.
39:42 DOe dus ghesciede dese dinc.
40:1 Hadde elke stad haren coninc.
40:2 Die iet dochte was van namen.
40:3 Mare vele coninghe te samen.
40:4 Waren enen onderdaen.
40:5 Jn dien tiden hebbict verstaen.
40:6 Waren beduonghen die .v. steden.
40:7 Van sodonien met mueghentheden.
40:8 Onder enen coninc alle viue.
40:9 Ende ghauen chens van haren liue.
40:10 Codor claomor van clamiten.
40:11 Hadde onder hem seghen die viten.
40:12 Die .v. coninghe van den .v. steden.
40:13 Ende duancse met moghentheden.
40:14 Si gauen hem chens .xij. iaer.
40:15 Jnt dertiende iaer dar naer.
40:16 Ontseiden sine hem al te male.
40:17 Dies cam hi ten .xiiij. iaere.
40:18 Met eenen here arde scone.
40:19 [Ammirafel] [coninc] [van] [babilone.]
40:20 Ende van ponten coninc arioch.
40:21 Ende van heidinen. een coning noch.
40:22 Die gheheten was tadal.
40:23 Dese viere camen al.
40:24 Vp sodomen met haren here.
40:25 Maer si vonden ghinder were.
40:26 Die coninghen van den .v. steden.
40:27 Camen daer met moghentheden.
40:28 Die coning van sodoma.
40:29 Van gomorra van adama.
40:30 Ende van bala der vichter stad.
40:31 Dese v. worden mat.
40:32 Ende worden ghesconfiert int dal.
40:33 Vor die viere coninghe al.
40:34 Al dat was in sodoma.
40:35 Roueden si varre ende na.
40:36 Wijf ende man ende hare kinder.
40:37 Ende al die haue die si ghinder.
40:38 Belopen mochten in den rike.
40:39 Ende die ontfloen was cam haestelike.
40:40 Ende seit den ebreuscen abram.
41:1 Dat men sinen neue vinc ende nam.
41:2 Hi adde in siere meisniede.
41:3 .ccc. ende .xviij. liede.
41:4 Die dapper waren ende stoud.
41:5 Die nam die deghen boud.
41:6 Ende met hem sine ghebure mede.
41:7 Die met rechter sekerhede.
41:8 Hem tiere wilen horden an.
41:9 Hi volghede al tote dan.
41:10 Banifel coning van babilonie.
41:11 Dats eene fonteinne daer die iordane.
41:12 Ersten bestaet vte te gane.
41:13 Dar cam hi ghevaren met crachte.
41:14 Vp die viere coninghe bi nachte.
41:15 Sijn volc haddi in drien ghescard.
41:16 Hi vantse slapende ende vervard.
41:17 Ende dronkin ende sonder were.
41:18 Dus sconfierde hi dat here.
41:19 Die men dar doet niet ne sloech.
41:20 Was blide dat hi tlijf ondroech.
41:21 Dus wan hi den coninghen aue.
41:22 Hare volc ende hare aue.
41:23 Ende loth sinen neue mede.
41:24 Do cam met groter vrolikede.
41:25 Die coninc van zodoma ieghen hem.
41:26 Ende die coninc van salem.
41:27 Dat iherusalem nv heet.
41:28 Melchisedech waest als ict weet.
41:29 Hiet die coninc als ict las.
41:30 Die gods ons heren pape was.
41:31 Hi groete abrame ende de sine.
41:32 Ende brochte broet met wine.
41:33 Hi gaf hem tetene daer ter stede.
41:34 Ende benedide abrame mede.
41:35 Van gode die hem sine viande.
41:36 Hadde ghegheuen onder hande.
41:37 Dar gaf hem abram die heleghe man.
41:38 Van al den goede dat hi wan.
41:39 Jn den stride rechte tiende.
41:40 Melchisedech die gode diende.
41:41 Dit deerste tiende als ict las.
41:42 Die oint ghegheuen was.
42:1 Dat abel gaf dat was hantghifte.
42:2 Hantghifte hetet na ghedichte.
42:3 Deerste vrucht dus segghen gesten.
42:4 Of van lande of van besten.
42:5 Die coninc van zodoma die bat.
42:6 Allene die liede dar ter stat.
42:7 Ende abram al tander helde.
42:8 Dar ne wilde van den ghelde.
42:9 Noch van den lieden abram niet.
42:10 Want hi hem tsijn al hebben liet.
42:11 Melchisedech was als ict las.
42:12 DErste coninc ende pape was.
42:13 Jn die stat van iherusalem.
42:14 Segghen die boeke dat was sem.
42:15 Des goeds noes outste sone.
42:16 Ende dat hi leuede de gone.
42:17 Tote dat ᨡsac was gheboren.
42:18 Dat hi abrame brochte voren.
42:19 Bede wijn ende broet.
42:20 Heuet bediedenesse groet.
42:21 Nu marct wat dat menen woude.
42:22 Dat dar na noch comen soude.
42:23 De rechte priester marien sone.
42:24 Ende hi offren soude die gone.
42:25 Vor ons sijn vlech ende sijn bloed.
42:26 Dat broet bediet als ict verstoet.
42:27 Sijn vlesch. ende die wijn bediet;
42:28 Sijn bloet. ende oec anders niet.
42:29 Noch alle daghe vp den outare.
42:30 Dient mere mede al openbare.
42:31 De wijn word dat selue bloet.
42:32 Dat vte ihesus siden woet.
42:33 Broet word oec die selue dinc.
42:34 Die vor ons an die cruce hinc.
42:35 Ende tselue sijds onuersaghet.
42:36 Dat marie droech die maghet.
42:37 Hier na sprac abram tesen here.
42:38 Jc bem dine hulpe tallen kere.
42:39 Ende den loen die grot sal wesen.
42:40 Abram antworde na desen.
42:41 Here nv ga ic sonder kint.
42:42 Ende ic ne ebbe gleslachts entwint.
43:1 Dese eliseer damascus.
43:2 Die cnape es in mijn huus.
43:3 Sal bliuen van minen goede here.
43:4 Du ne gheues mi kint no min no mere.
43:5 Van desen damas leesmen mede.
43:6 Dat hi maecte damas die stede.
43:7 Ende hire sider was here.
43:8 God andworde ten kere.
43:9 Een kint dattv winnen soud.
43:10 Sal ebben dins goeds ghewoud.
43:11 Abram ghelouets onsen here.
43:12 Des hi sident hadde lof ende here.
43:13 Ende god ghaues hem tekin daer.
43:14 Oec seidi weet vor waer.
43:15 Dat dijn gheslachte in hare hand.
43:16 Noch sal hebben al dit land.
43:17 Om dat god behiet dit doen.
43:18 Heet land van promissioen.
43:19 Dat lant dat hi belouede hem.
43:20 Noch eist lant van iherusalem.
43:21 Dat onse eue es ende onse belof.
43:22 God later ons here warden of.
43:23 Al hebben wijt met sonden verburd.
43:24 Sarra die ghenomt word.
43:25 Van liue was en scone wijf.
43:26 Ne hadde noch toe in hare lijf.
43:27 Nie kind ghehad bi abram.
43:28 Do seide soe als ict vernam.
43:29 God heuet mi kint draghen benomen.
43:30 Du soud te minen ioncwiue comen.
43:31 Agarre ic gheues di orlof.
43:32 Ende winne mi kinder der of.
43:33 Huelic was do becant.
43:34 Vor thelechst leuen dat men vant.
43:35 Anagar dat weet men wel.
43:36 So wan abram ᨡsmael.
43:37 Sijn gheslachte dat sal comen.
43:38 Dus eist bescreuen van hem somen.
43:39 Hier naer entie werelt duinghen.
43:40 Harde seere met fellen dinghen.
43:41 Papen sulsi te sticken houwen.
43:42 Ende vercrachten oec die vrouwen.
44:1 Hare parde ende hare besten mede.
44:2 Sulsi stallen in helegher stede.
44:3 Al dus sulsi wreken die sonden.
44:4 Van den vulen kerstinen honden.
44:5 DAr na sprac god te abrame den houden.
44:6 Jc sal dijn gheslachte menechuouden.
44:7 Ende seide al hiestu eerst abram.
44:8 Du soud noch heten abraham.
44:9 Ende dijn wijf die hiet sarraᨡ
44:10 Sal heten sarra der bi.
44:11 Dus langhede god sine name al dare.
44:12 Ende corte oec die hare.
44:13 Want sijn gheloue vaster was.
44:14 Oec seidi sijd seker das.
44:15 Van hare sal ic di gheuen eenen sone.
44:16 Abram loech ende neech om tgone.
44:17 God gheboed hem daer ter stede.
44:18 Dat hi hem emmer besnede.
44:19 Dat seide abraham gherne wel.
44:20 Hem besneet hi ende ᨡsmahel.
44:21 Ende al sine meisniede.
44:22 Ja dat men vint van man diede.
44:23 Do was hi houd dit was waer.
44:24 Jn sijn neghende neghenstich iaer.
44:25 Ende ᨡsmahel .x. iaer ende drie.
44:26 Darna so versach hie.
44:27 Dar hi vor sine dore sat.
44:28 Drie man comen in eenen pat.
44:29 Drie ingle warent in mans ghedane.
44:30 Abraham die liep hem hane.
44:31 Drie sach hire ende hanebeder eenen.
44:32 Nv merct wel wat mach dit meenen.
44:33 Jn drien personen eenen god.
44:34 Sal men anebeden in gods ghebod.
44:35 Die een sprac te naesten iare.
44:36 Salic weder comen hare.
44:37 Ende sarra die sal ebben kint.
44:38 Sarra loech ende horde ghint.
44:39 War si waren bede houd.
44:40 Hare ghebracht de rechte scoud.
44:41 Die vrouwen ghelden te haren daghen.
45:1 Alse langhe alsi kint moghen draghen.
45:2 Ende soe seide nv ic van daghen.
45:3 Bem verhout. salic kint draghen.
45:4 Ende mijn here es kerrel mede.
45:5 Do sprac die inghel dar ter stede.
45:6 Tvi loech sarra daer soe stoet.
45:7 Bacter dore ende soe verstoet.
45:8 Dat soe kint sal draghen hier naer.
45:9 Es gode iet te doene suaer.
45:10 Sarra loechenets van vare.
45:11 Maer die inghel seide te hare.
45:12 Du draecst ende wes seker van dien.
45:13 Dat ic seide sal ghescien.
45:14 DAt sarra loech om dat so soude.
45:15 Een kint draghen in hare houde.
45:16 Want so adde .xc. iaer.
45:17 Ende hare ghebrac wet vor waer.
45:18 Des ghenen wiue mach ghebreken.
45:19 Dien kint sal draghen horic spreken.
45:20 Wat moghe wi anders der ane scouwen.
45:21 Dan marien onser vrouwen.
45:22 Die ieghen nature droech.
45:23 Jhesus dar soe omme loech.
45:24 Sonder smerte ende sonder sonde.
45:25 Sonder last ende sonder wonde.
45:26 Van haren reinen maghedoeme.
45:27 Hi was die vrucht ende soe die bloeme.
45:28 Bede droeghen si ieghen nature.
45:29 Als ons tellet die scrifture.
45:30 Want sarren ghebraect ander jueghet.
45:31 Maria want bi hare dueghet.
45:32 Ende bi der gods ghenaden.
45:33 Dat soe met laste word gheladen.
45:34 Die hare reinicheit verclarde.
45:35 Ende hare in ghere dinc versuarde.
45:36 Dits ihesus ons gherechte ioie.
45:37 Onse lachen die van vernoie.
45:38 Ons losen sal met sire ghewelt.
45:39 Ghelic dat hi sire moeder helt.
45:40 Moeder te sine in reinicheden.
45:41 Jeghen der naturen zeden.
45:42 DJe viere ingle metter vaerd.
45:43 Ghinghen te sodonien waerd.
46:1 Ende abraham ghebrochtse mede.
46:2 Do sprac onse here dar ter stede.
46:3 Dat de sonden van sodonia.
46:4 Ende van den lande van gomorina.
46:5 Vor hem riepen omme wrake.
46:6 Ende hi sien wilde de sake.
46:7 Weder dat waer ware ofte niet.
46:8 Nv merct wat dat bediet.
46:9 Dits exemple dat een eere.
46:10 Ne mach altoes mijn no meere.
46:11 Dinc berechten die hem wel.
46:12 Cont es ende niemene el.
46:13 Hen es gheproeuet bi orconden.
46:14 Abraham ghedochte tien stonden.
46:15 Loths sijs neuen ende seide.
46:16 Here sal dine ghenadichede.
46:17 Den goeden doden metten quaden.
46:18 Du die best vul van ghenaden.
46:19 Al verdrincdise sekerlike.
46:20 Die waren in die .v. conincrike.
46:21 Onder hem allen .x. goede man.
46:22 Hi lietse alle leuen dan.
46:23 Hier bi liet abraham die tale.
46:24 Ende hi kerde te sire sale.
46:25 Ende tve ingle die quamen.
46:26 Des auonts bede te samen.
46:27 Tote sodomen der stad.
46:28 Dar loth vor sine dore sat.
46:29 Alse een die omme gaste wachte.
46:30 Die hi herberghede bi nachte.
46:31 Do hise sach liep hi hem te ghemoete.
46:32 Ende hanebededse vp hare voete.
46:33 Hi badse met hem vp ghenaden.
46:34 Si seiden dat sijt niet ne daden.
46:35 Doch dat hijs hem met crachte bat.
46:36 Ende do si camen in die stat.
46:37 Camen die mans teere summe.
46:38 Ende beleiden dat huus al omme.
46:39 Tote lotte seiden si dan.
46:40 Brinc ons hare voerd dien man.
46:41 Later ons mede doen onsen wille.
46:42 Loth die seide suighet stille.
47:1 Doet mine gaste niet te leede.
47:2 Ende nemt mine dochtren bede.
47:3 Die maghet sijn ende onbesmet.
47:4 Ende doeter uwen wille met.
47:5 Goede liede plaghens vaste.
47:6 Doe te bescermene hare gaste.
47:7 Sine wilder niet de sodomiten.
47:8 Maer si begonden hem verwiten.
47:9 Dat hi een incomelinc ware.
47:10 Ende daden hem cracht al te suare.
47:11 Mare dingle traken inne doe.
47:12 Ende loken die dore toe.
47:13 Den andren namen si dat sien.
47:14 Lothte seide si mettien.
47:15 Leed dine liede vter stede.
47:16 Soe moet barnen ende alt volc mede.
47:17 Loth seide sinen vrienden daer.
47:18 Maer sine hildent niet ouer waer.
47:19 TJleke namen dingle den man.
47:20 Ende sine tve dochtre die hi wan.
47:21 Ende dar toe mede sijn wijf.
47:22 Om te behoudene hare lijf.
47:23 Ende lededse buter port.
47:24 Si seiden vlie ten berghen vort.
47:25 Ende sie achter ward oec niet.
47:26 Loth dede dat men hem hiet.
47:27 Ende liep dar bi in eene stede.
47:28 Mar sijn wijf was van wankelen zeden.
47:29 Doe deet god reinen van den trone.
47:30 Sulfer ende vier te lone.
47:31 Ende te wraken van haren sonden.
47:32 Tvijf horde dat lud tien stonden.
47:33 Ende bleef staende doet allene.
47:34 Jn die ghelike van .i. zoudstene.
47:35 Ende ald lant verbarnede sciere.
47:36 Bede met sulfre ende met viere.
47:37 Nv eist water inne weets nemmee.
47:38 Ende heet die dode zee.
47:39 Want menre leuens niet inne vint.
47:40 Vische no voghels niet eentvint.
47:41 Dar ne mach ghen scip in varen.
47:42 No niet vloten oec te waren.
47:43 Dat sonder lijf es gaet al te gronde.
48:1 Gheuillet oec in enegher stonde.
48:2 Dat menre in dade bernende lecht.
48:3 Dat souder bouen vloten echt.
48:4 Ghinc soe vte soe soude sinken.
48:5 Daer staen bome hor ic ghedinken.
48:6 Die apple draghen scone ende groene.
48:7 Alsi ripen na haren doene.
48:8 So vind men asschen der in.
48:9 Ende anders niet no meer no min.
48:10 LOth was ersten in segor gheweken.
48:11 Do hi van sodomen was ghesteken.
48:12 Dane ghinc hi in eene hole.
48:13 Wone of hi ware in dole.
48:14 Onder eenen berch in eene stede.
48:15 Hi ende sine tve dochtre mede.
48:16 Sine tve dochtre hadden verstaen.
48:17 Dat die werelt soude vergaen.
48:18 Ende ghedoemt werden met viere.
48:19 Si waenden dat in derre maniere.
48:20 De werelt ware vergaen al gader.
48:21 Ende si tve ende hare vader.
48:22 Leueden ende als volx nemme.
48:23 Ende dat allenliken si tve.
48:24 De werelt vervullen souden.
48:25 Bedi namen si den houden.
48:26 Haren vader de dochter sine.
48:27 Ende maectene dronkin van wine.
48:28 Also daden sine met luste.
48:29 Dat hijs selue niet ne wiste.
48:30 Bi hem slapen ende ontfinghen.
48:31 Dat si bede met kinde ghinghen.
48:32 Moab hiet der ouster sone.
48:33 Die selue moab es die gone.
48:34 Dar die moabiten of camen.
48:35 Noch heten si na hem bi namen.
48:36 Amon hiet tioncster kint.
48:37 Van hem camen dats bekint.
48:38 Die amoniten die ic sal nomen.
48:39 Hier naer dar ic an sal comen.
48:40 Also als ic hier voren seide.
48:41 Abraham ende sarra si beide.
48:42 Wonnen .i. kint dar hem god of.
48:43 Te voren hadde ghedaen ghelof.
49:1 Besnedet wasset van abrame.
49:2 Ende ghegheuen sine name.
49:3 Doe het hadde der daghe achte.
49:4 Noch pleghemens in abraems gheslachte.
49:5 Joden ende oec ander volc mede.
49:6 Te doene na deser zede.
49:7 ᨓsac hiet hi bi namen.
49:8 Om dat si loghen bede te samen.
49:9 Alt hem god behiet dat kint.
49:10 ᨓsac dans niet eentvint.
49:11 Dan lachen in ebruescher tale.
49:12 Van ysmahele latic al te male.
49:13 Abraems sone dar of cam.
49:14 Grod gheslachte als ict vernam.
49:15 Maer dat algader heidin was.
49:16 Van ᨡsacke als ict las.
49:17 Cam maria die moeder ons heren.
49:18 Te sire geste willic mi keren.
49:19 Ouer eene wile daer naer.
49:20 Do ᨡsac hadde .xxv. jaer.
49:21 Onse here abrame ane sprac.
49:22 Nem dinen lieuen sone ᨡsaac.
49:23 Ende ganc int lant van visioene.
49:24 Ende offerne mi te minen doene.
49:25 Vp eenen berch die ic di wise.
49:26 Jn dien tiden plaghen die wise.
49:27 Die offrande die si gode.
49:28 Offerden te sinen ghebode.
49:29 Dat sise slogen vp eenen outaer.
49:30 Ende bernedse al daer.
49:31 Abraham maecte hem ter stede.
49:32 Darne god doe varen dede.
49:33 Ende liet sinen cnape achter bliuen.
49:34 Hi ende sijn sone ghinghen cliuen.
49:35 Vp den berch do maecte daer.
49:36 Abraham eenen outaer.
49:37 Ende leider vp hout ende vier.
49:38 Sinen sone dat leesmen hier.
49:39 Band hi sijn hande metter vart.
49:40 Ende leiden dar vp ende trac sijn suart.
49:41 Vp dat hine soude slaen te doet.
49:42 Mar die inghel die verboet.
50:1 Ende seide nv wet onse here.
50:2 Dat tune onsies wel seere.
50:3 Achterward sach abraham.
50:4 Eenen weder hi vernam.
50:5 Dat hi verwerret metten horen.
50:6 Ghinder hinc in scarpen doren.
50:7 Dien offerdi ouer den sone.
50:8 Bedi hiet hi om dat de gone.
50:9 De stede. god die salt bescouwen.
50:10 Dus kerden si quite van den rouwen.
50:11 Ende god suoer van hem seluen daer.
50:12 Dat hi soude dat lant der naer.
50:13 Den sinen gheuen emmermere.
50:14 Thuus cam abraham die here.
50:15 MErct wat meent abraham.
50:16 Dat hi sinen sone nam.
50:17 Ende hine ter offranden ontfinc.
50:18 Nochtanne metten liue ontghinc.
50:19 Dat betekent sekerlike.
50:20 Dat die vader van hemelrike.
50:21 Jhesus offerde sijn kint.
50:22 Dor ons sijn scout waest niet entvint.
50:23 Te monte caluarien ter stede.
50:24 Dar vinden wi bescreuen mede.
50:25 Dat ter steden dar metten horen.
50:26 Die ram hinc in den doren.
50:27 Jhesus an der crucen hinc.
50:28 Distorie seghet oec dese dinc.
50:29 Ter seluer stede al ouer waer.
50:30 Dat abraham maecte den outaer.
50:31 Dat dar de temple wart ghemaect.
50:32 Van salomone die was wel gheraect.
50:33 ᨓsac die der doet ontghinc.
50:34 Mach bedieden dese dinc.
50:35 Dat ons heren godlichede.
50:36 Van allen pinen hadde vrede.
50:37 De menschelicheide bediet den ram.
50:38 Die de passie dor ons nam.
50:39 Dus eist openbare anschine.
50:40 Dat die menscheit ghedoghede pine.
50:41 Ende die godlicheit dar af.
50:42 Niene ghevolde een caf.
50:43 Dus alse ghi hier moghet horen.
51:1 Was ons verlossen bediet te voren.
51:2 Hem cam bode dat nachanor sijn broeder.
51:3 Sijns vader kint ende sire moeder.
51:4 Hadde ghewonnen bi melcha.
51:5 Die suster was sijns wijfs sarra.
51:6 .viij. sonen wi lesen dus.
51:7 Dat men hiet den ousten hus.
51:8 Van hem so was iob gheboren.
51:9 Dar men dueghet af mach horen.
51:10 Ende een ander hieter bus.
51:11 Van hem lese wi al dus.
51:12 Dat die prophete van hem cam.
51:13 Die gheheten was balaam.
51:14 Die derde so hiet batuel.
51:15 Van den andren suighe wijs wel.
51:16 Mine roec wat der of was gheboren.
51:17 Want si ter gesten niet ne boren.
51:18 Abraham woende dar amre.
51:19 Jn dat dal dat hiet nambre.
51:20 Ende sarra die starf sijn wijf.
51:21 Alsoe hadde in dit lijf.
51:22 Gheleuet .c. iaer .xx. ende .vii.
51:23 Abraham dalfse daer beneuene.
51:24 Jn de tviuoudighe haghedochte.
51:25 Die hi daer te voren cochte.
51:26 De sine te deluene dor die lieue.
51:27 Dat dar lach adam ende ᨡeue.
51:28 Abraham was hout van daghen.
51:29 Om helᨡsier hiet hi vraghen.
51:30 Die al was sijns huus bereit.
51:31 Aldus heueti hem gheseit.
51:32 Suerre mi dat bi onsen here.
51:33 Dat tv ne nems nemmermere.
51:34 Wijf ne ghene van minen kinde.
51:35 Want ixe noch niet ne minde.
51:36 Vten lande van canaan.
51:37 Maer vare te minen gheslachte dan.
51:38 Ende nem hem .i. wijf al daer.
51:39 Ende wille soe di niet volghen naer.
51:40 So bestu quite van den ede.
51:41 Dat suoer helᨡsier gherede.
52:1 .x. kemele nam hi daer na.
52:2 Ende voer in mesopotania.
52:3 Met hem voerdi vele das.
52:4 Dat selsiene in dat lant was.
52:5 Vp eene auonstonde hi cam.
52:6 Toter stede van carram.
52:7 Ende was daer wel ontfaen.
52:8 De maghet gaf men hem saen.
52:9 Die vroet ende scone was ende became.
52:10 Rebecca was hare name.
52:11 Mar talreest was hare ghevraghet.
52:12 Jof het hare te doene behaghet.
52:13 Des men te voren lettel plach.
52:14 Bedi waest na ghenen dach.
52:15 Vord meer also vaste gheset.
52:16 Dat mens noch pleghet ende het es wet.
52:17 Dat men niemen gheue man.
52:18 Soe ne lie selue der an.
52:19 Die cnape brochte die maghet te lande.
52:20 Ende ᨡsaac die namse bi hande.
52:21 Hi trouwedse ende hi dede haer here.
52:22 Oec verminde hise so seere.
52:23 Dat hi dor hare de rouwe grod.
52:24 Vergat van sire moeder doet.
52:25 Abraham nam oec dar na.
52:26 Een wijf ende hiet cecura.
52:27 Dar hi .vi. sonen bi ghewan.
52:28 Want bi naturen oude man.
52:29 Ende ioncwijf wonnen vele kinder.
52:30 Hare lant besciet hi ghinder.
52:31 Van ᨡsacke sinen liefste sone.
52:32 Josephus scriuet dat die gone.
52:33 Wonnen harde groet gheslachte.
52:34 Die de lande hadden met machte.
52:35 Een van den ghenen wan .i. kint.
52:36 Dat affer hiet van hem was sint.
52:37 Gheheten tland van affrica.
52:38 Dat alre eerst hiet libia.
52:39 Oec waser een die hiet citus.
52:40 Van ceturen scriuet josephus.
52:41 Ende na hem des wille hic lien.
52:42 Was gheheten tland van surien.
53:1 .C. iaer. ende .lxx. ende viue.
53:2 Leuede abraham in desen liue.
53:3 Do starf hi helechlike ende wel.
53:4 ᨓsaac. ende ᨡsmahel.
53:5 Sine kindre groeuene niet verre.
53:6 Al dar bi dar soe lach sarre.
53:7 Jn de tviuoudighe aghedochte.
53:8 Leidsine dat hi wilen cochte.
53:9 Nv suldi merken ende verstaen.
53:10 Hoe die tiden sijn vergaen.
53:11 Al dat was in erderike.
53:12 Anebede ghemeenlike.
53:13 Afgode ende het was heidin diet.
53:14 Sonder dat van abrahame qam.
53:15 Ende van ᨡsaacke sinen sone allene.
53:16 Anders waren si harde clene.
53:17 Dies hem helden ane gode.
53:18 Tien tiden hadde si ghebode.
53:19 Ende hare macht verre ende na.
53:20 Die heren van assiria.
53:21 Daer eerst crone in droech lelus.
53:22 Ende nam hem sijn sone ninus.
53:23 Die was die eerste orloghes man.
53:24 Die de eerste afgode maken began.
53:25 Do abraham hout was .xi. iaer.
53:26 Do starf ninus weet vor waer.
53:27 De crone behel na sijn lijf.
53:28 Semiramis de vrouwe sijn wijf.
53:29 Alse wi lesen in die boeke.
53:30 So was die eerste die makede broeke.
53:31 Ende den mur van babilone.
53:32 So starc makede ende so scone.
53:33 Hare kint nam soe te manne.
53:34 Ende behelt die crone danne.
53:35 Dat rike stont .mccc. iaer.
53:36 Ende .li. weet vor waer.
53:37 Coninghe had sie .xxx. ende achte.
53:38 Gheboren van hare gheslachte.
53:39 Ysmahel was in desen leuene.
53:40 .C. ende .xxx. ende zeuene.
53:41 Van hem cam grot volc ende rike.
54:1 Dat bleef heidin ghemeenlike.
54:2 Maer dat laten wi al varen.
54:3 Ende scriuen van ᨡsaacke sonder sparen.
54:4 Daer dat edel wleesch af cam.
54:5 Dat duer ons steruen ane nam.
54:6 Rebecca als ict bescreuen vinde.
54:7 ᨓsaacs wijf die word met kinde.
54:8 Ende droegher te gader tve.
54:9 Die vochten ende waren gheve.
54:10 Daer si in der moeder laghen.
54:11 Des voersijs onsen here vraghen.
54:12 Beede soe ende hare man.
54:13 Onse here andworde dan.
54:14 Dine .ij. kinder die bedieden.
54:15 Tve manieren van .ij. lieden.
54:16 Die hier na sullen versceden.
54:17 Ende met strijt den tijt leden.
54:18 De merre sullen sijn onderdaen.
54:19 Den ioncsten al sonder waen.
54:20 Nv merct wel van esau.
54:21 Bede roet was ende rv.
54:22 Ende dat hi eer oec wart gheboren.
54:23 Jacob was van sconeit vercoren.
54:24 Esau bediet die iueden.
54:25 Die nu rv sijn alse rueden.
54:26 Ende ondercoemen diet.
54:27 Dat hi roed was dat bediet.
54:28 Dat si besmet sijn van den bloede.
54:29 Dat ihesus storte die goede.
54:30 Si waren eer van gode vercoren.
54:31 Ende hadden van hem als wijd horen.
54:32 Die wet erst nv ghelouet mi.
54:33 Vp den bercgh van sᨡnaᨡ
54:34 Mar iacob die ionxte man.
54:35 Bediet als ict merken can.
54:36 Tkerstin dat nv de vaerd.
54:37 Heuet ten hemelerike waerd.
54:38 Wi ebben hem of met groten roeme.
54:39 Ghewonnen hare ouderdoeme.
54:40 Ende al haer recht ende al haer ere.
54:41 Ende oec sulsi emmermere.
54:42 Den kerstin sijn onderdaen.
55:1 Tote dien dat si vallen gaen.
55:2 An onse gheloue dit es die strijt.
55:3 Dit god vorseide langhe tijt.
55:4 DAer na als recht tijt was.
55:5 Rebecca der kinder ghenas.
55:6 Die ghene diere eerst was gheboren.
55:7 Was rv ende roed alse wijt horen.
55:8 Maer dander die gheboren ward naer.
55:9 Haddene bi den voeten daer.
55:10 Als of hi hem wilde hebben benomen.
55:11 Dat hi niet eerst vort ware comen.
55:12 Jacob was hi bedi ghenant.
55:13 Dat bediet dat es bekant.
55:14 Verwinre of supplantere mede.
55:15 Die houste was gheheten daer ter stede.
55:16 Esau. dit wonder groet.
55:17 Ghesciede vor abraems doet.
55:18 Als ict las .xv. iaer.
55:19 Jn dien tiden weit vor waer.
55:20 Dat ᨡsaacke .ij. kindre waren gheboren.
55:21 Alse wijt bescreuen horen.
55:22 Ende oec in dat selue iaer.
55:23 So begonste wet vor waer.
55:24 Tgriexe rike met moghentheden.
55:25 Tote argos arder steden.
55:26 Ende deerste coning was inacus.
55:27 Dat ghedurde wi lesent dus.
55:28 Tote in den tijt dat delbora wel.
55:29 Berechte tfolc van israhel.
55:30 .xiiij. coninghe ware binnen.
55:31 Dar na aldus moghen wijt bekinnen.
55:32 Alst hadde ghedurt .v.c. iaer.
55:33 Ende .xliiij. dat es waer.
55:34 Sloech doed die coene perceus.
55:35 Sinen hoem acrisius.
55:36 Sijns ondanx met onghevalle.
55:37 Ende nam dat rike al met alle.
55:38 Dien van argos diet hadden eer.
55:39 Ende droech crone vordwaert meer.
55:40 Jn mischene sine port.
55:41 Nv hort die hᨡstorie vort.
55:42 Do ᨡsax kinder segghic v.
55:43 Jacob ende oec esau.
56:1 Cam te haren manliken daghen.
56:2 Kerde hem esau ant jaghen.
56:3 Jacob word erde ackerman.
56:4 ᨓsaac leide sinen sijn der an.
56:5 Dat hi den outsten vercoes.
56:6 Ende die moeder den ioncsten altoes.
56:7 Tenen tide hadde die wise.
56:8 Jacob ghemaect eene spise.
56:9 Ende esau cam van den velde mede.
56:10 Hi sprac goede ghef mi tetene.
56:11 Van desen pulmente rod.
56:12 Want mie moiet die moeteit grod.
56:13 Jacob sprac vercoep mi dan.
56:14 Want du best die oudere man.
56:15 Dijn voedeel dar of dijn recht.
56:16 Dat dede esau dar ech.
56:17 Ende suoer dat hi den eet altoes.
56:18 Vaste hilde an sonder loes.
56:19 Om de rode spise hietene som.
56:20 Die liede esav edom.
56:21 Ende sijnt landscap warter na.
56:22 Oec gheheten ᨡdimisa.
56:23 Nu merct die de houste was.
56:24 Wat vordeel hi hadde das.
56:25 Den ousten was altoes ghereet.
56:26 Tien tiden een sonderlinghe cleet.
56:27 Dat plach hi an te doene mede.
56:28 Alse hi sacrificie dede.
56:29 Ende hi plach tonfane al gader.
56:30 Dachterste benedictie van den vader.
56:31 Daer oec werscepe was ofte feeste.
56:32 Benediede alse die meeste.
56:33 Ende adde viere manne deel.
56:34 Oec so nam hi al gheheel.
56:35 Van vader goede na sijn leuen.
56:36 Tve kinder deel dus eist bescreuen.
56:37 SJdent gheviel ᨡsaac me.
56:38 Do hi wonde in barsabe.
56:39 Dat hem god daer openbarde.
56:40 Ende seide dat hi hem niet ne vervarde.
56:41 Hi soude hem dat doen al gader.
56:42 Dat hi behiet sinen vader.
57:1 Ghinder maecte hi eenen outaer.
57:2 Ende aneriep onsen here daer.
57:3 Jn dien tiden was foroneus.
57:4 Die dies sone was ᨡnacus.
57:5 Hi visierde eerst wet in grieken land.
57:6 Hi visierde ende vant.
57:7 Dat men den rechter wildijt horen.
57:8 Alle die saken brochte te voren.
57:9 Forum nomede hi die stede.
57:10 Dar men den lieden recht vp dede.
57:11 So was sijn suster te waren.
57:12 Die in egᨡpten cam ghevaren.
57:13 Ende visierde lettren al daer.
57:14 Oec leerd soe hem weet vor waer.
57:15 Vele acker neringhen mede.
57:16 Doe soe doet was hort wat men dede.
57:17 Maecten sire of eene godinne.
57:18 Dor hare conste van groter minne.
57:19 Froneus sone die apis hiet.
57:20 Cam oec onder tegᨡpsce diet.
57:21 Dien maecten si na sine doed.
57:22 En god werdt ende groed.
57:23 Serapis so hieten sine.
57:24 Dus dolden die sarrasine.
57:25 Nv hord van ᨡsaax gheslachte.
57:26 Dat es daer ic meest vp achte.
57:27 Esav ward van .xl. iaren.
57:28 Ende hi nam .ij. wijf te waren.
57:29 Wel gheboren van canaan.
57:30 Dat was leet den goeden man.
57:31 ᨓsaac ende siere moeder mede.
57:32 Dat hi al sulc huwelic dede.
57:33 Hi deet omme moghende te sine.
57:34 Onder die rike heidine.
57:35 ᨓsaac ward out hets recht.
57:36 So dat hi verloes sijn lecht.
57:37 Sinen sone riep hi esau.
57:38 Maec mi van diere iachte nv.
57:39 Spise die ic heten mach.
57:40 Dat die vor minen sterfdach.
57:41 Mine ziele mach benedien.
57:42 Esav dus horic lien.
58:1 Nam eenen boghe ende scichte.
58:2 Ende voer iaghen int velt ghedichte.
58:3 Rebecca hare tvier moeder.
58:4 Die riep iacob sinen broeder.
58:5 Ende seide hem die worde al gader.
58:6 Die ghesproken adde sijn vader.
58:7 Brinc mi .ij. goede hoekine saen.
58:8 Jc sal daer af al sonder waen.
58:9 Spise dinen vader maken.
58:10 Die hi heet vor alle saken.
58:11 Dus soutu ghebenedijt wesen.
58:12 Node dede hijt alse wijt lesen.
58:13 Doech dede hi der moeder raet.
58:14 Doe soe tetene hadde begaet.
58:15 Cledet soene arde sciere.
58:16 Met cleedren goed ende diere.
58:17 Die esau hadde in dien daghen.
58:18 Alse die houste sonen plaghen.
58:19 Die moeder sinnes adde vele.
58:20 Decte sinen hals ende sine kele.
58:21 Dattene de vader vonde rv.
58:22 Jof hi tvifelde van esav.
58:23 Tetene heueti voer hem gheset.
58:24 Ende hi seide vader nv het.
58:25 Ende seine mi mettien so sprac.
58:26 Dat hi te hem quame ᨡsaac.
58:27 Hi wilde tasten oft esav ware.
58:28 Jacob ward bestaen met vare.
58:29 Dits esaus hand ende iacobs lud.
58:30 Sprac hi ende ad die spise al vp.
58:31 Ende doe hi adde ghedronken wijn.
58:32 Custe hi den sone sijn.
58:33 Ende benediedene ende seide mede.
58:34 God die gheuedi wlhede.
58:35 Der werdicheit van erderike.
58:36 Ende des dans van hemelrike.
58:37 Corens wijns ende olien mede.
58:38 Onder dine moghenthede.
58:39 Moet tfolc sijn beduonghen sere.
58:40 Wes van dinen broedren here.
58:41 Diede seint si ghebenedijt.
58:42 Ende die di vloect die si di ontvrijt.
59:1 DOe dit seinen was ghedaen.
59:2 Jacob was cume vte ghegaen.
59:3 Ende esau sine spise brochte.
59:4 Ende die benedixie sochte.
59:5 Wart ᨡsaac wonderende sere.
59:6 Jn dien wondre toghede onse here.
59:7 Hem dat wlgaen moeste vord.
59:8 An sijn kint die heleghe word.
59:9 Bedie sone ward hi niet gram.
59:10 Hi andworde alse hi bequam.
59:11 Dijn broeder es scalkelike comen.
59:12 Ende heuet dine benedixie ghenomen.
59:13 Esav sprac en was ghen scop.
59:14 Dat hi was gheheten iacob.
59:15 Hi cochte mi of van mire houden.
59:16 Mine benedictie heuet onthouden.
59:17 Vader benedie mi mede.
59:18 Nv vernemt wat ᨡsaac dede.
59:19 Hi behiet hem hi moeste staen.
59:20 Den broeder te sine onderdaen.
59:21 [Maer] [vet] [lant] [ende] [ghedrachtech] [mede.]
59:22 [Behiet] [hi] [hem] [daer] [ter] [stede.]
59:23 Esav droech den nijt groet.
59:24 Ende seide ware mijn vader doet.
59:25 Jc soude iacobe te doet slaen.
59:26 Rebecca heuet dat verstaen.
59:27 Ende seide lieue kint vare dan.
59:28 Tote minen broeder laban.
59:29 Jn mesopotania.
59:30 Toten vader ghinc soe dar na.
59:31 Ende seide ic verliese mijn lijf.
59:32 Eist dat iacob nemt een wijf.
59:33 Vten lande van chanaan.
59:34 ᨓsaac ontbodene dan.
59:35 Ende benediedene ende soe der na.
59:36 Vare in mesopotania.
59:37 Nem een wijf van labans kinden.
59:38 Jacob sciet van diene minden.
59:39 Ende voer te sijns hoems ward.
59:40 Bi lusa cam hi an die vard.
59:41 Vpt felt lach hi ende niet allene.
59:42 Sijn houet leide hi vp eenen stene.
59:43 Jn sinen slape hi versach.
60:1 Ene ledre dar hi lach.
60:2 Van der herden ten hemele slaen.
60:3 Ende ingle vp ende neder gaen.
60:4 DE ledre na dien dat ix vroet bem.
60:5 Dat es die dochter joachim.
60:6 Die soe droech die salighe anne.
60:7 Troost alre wijf ende alre manne.
60:8 Die soete heleghe maghet marie.
60:9 Dar ic vp ope ende lie.
60:10 Die tve leder bome sijn mede.
60:11 Omoet ende suuerhede.
60:12 Die van herden te hemele ghinghen.
60:13 Ende gode in haren lechame vinghen.
60:14 Alse menich stap alse der toe horde.
60:15 Ne mochtic niet in dieschen worde.
60:16 Ghesegghen mijn sin es so cranc.
60:17 De leder bome waren so lanc.
60:18 Also ne mochtic in derre wijs.
60:19 Marien dueghet ende hare prijs.
60:20 Ende hare ghenaden niet wul scriuen.
60:21 Noch al dat oit cam van wiuen.
60:22 Vp dese ledre moete wi cliuen.
60:23 Jof alle verloren bliuen.
60:24 Hen ware dat soet selue dede.
60:25 Met ghere bendechede.
60:26 Ne camen wi in hemelrike.
60:27 Soe es onse troest vaste ende rike.
60:28 Wine clemmen niet soene doet.
60:29 Van hare sal ons commen die spoet.
60:30 Ende eist dat wi vp hare lien.
60:31 God diere vp was ghesien.
60:32 Sal ons die hand bieden mede.
60:33 Ende helpen bi hare ghebede.
60:34 Hie sach vp die ledre.
60:35 Die hem seide ic bem dijn ledere.
60:36 Abrahams god ende ᨡsaac.
60:37 Dits tland dar ic aue sprac.
60:38 Dat die sijn ende der diere.
60:39 Jacob wart ontwake sciere.
60:40 Ende hi sprac in dese stede.
60:41 Es ons heren godlichede.
61:1 Al ne wistic min no mere.
61:2 Dese stede es ontsienlic sere.
61:3 Dits gods huvs ende die hemel porte.
61:4 Hier vorseide gods gheborte.
61:5 Den temple gods ende oec die weet.
61:6 Die sident int land was gheset.
61:7 Want die wet es ontsienlic sere.
61:8 Thuvs gods es des temples here.
61:9 De hemel porte bediet tgat wide.
61:10 Dat was an ons heren zide.
61:11 Den steen recht hi vp den dach.
61:12 Dar hi vp in slape lach.
61:13 Te bekenne die stede.
61:14 Ende goeter vp olie mede.
61:15 Gode belouedi ten kere.
61:16 Daer te doene offrande mere.
61:17 Die stede die daer stont oec na.
61:18 Die te voren hiet lusa.
61:19 Heet hi bi namen betel.
61:20 Dats gods huvs ende niet el.
61:21 SO langhe ghinc hi dat hi cam.
61:22 Toter stede die hiet carram.
61:23 Dar ne sijn hoem wel ontfinc.
61:24 Do hi hadde verstaen die dinc.
61:25 Seidi hier moghestu seker wesen.
61:26 Vorworde maecten si na desen.
61:27 Dat hem iacob soude dienen wel.
61:28 .xij. iaer omme rachel.
61:29 Die sijn ioncste dochter was.
61:30 So dat laban ghehinghede das.
61:31 Rachel was een scone kint.
61:32 So sere heuesse iacob ghemint.
61:33 Dat hem de iare dochten ontlanc.
61:34 Na der .vij. iaeren ganc.
61:35 Alse hi hebben waende sijn lief.
61:36 Brochte hem laban alse een dief.
61:37 Hemelike met groten liste.
61:38 So dat iacob niet ne wiste.
61:39 Sire oudster dochter te bedde gheleed.
61:40 Dat was iacoppe arde leed.
61:41 Des morghins alse hijt vernam.
61:42 Ende seide ten hoem erre ende gram.
61:43 Waer omme heuestu dat ghedaen.
62:1 Laban seide sonder waen.
62:2 Men pliet hier al sulker dinghen.
62:3 Dat wi eerst doutste te manne bringhen.
62:4 Jacob moeste dit ghedoghen.
62:5 So was lelic ende met sepel oghen.
62:6 Ende gheheten oec lᨡa.
62:7 Recht diende hi .vij. iaer der na.
62:8 Omme rachel so dat hise ghewan.
62:9 Die lᨡa droech bi haren man.
62:10 Ruben. leui. ende sᨡmeone.
62:11 Judas. ᨡsachar. sabulone.
62:12 Sesse sonen ender der na.
62:13 Heen dochter heet dina.
62:14 Rachel droecher vele min.
62:15 Tve sonen ioseph ende beniamin.
62:16 Lᨡa bediet die oudec wet.
62:17 Die lelic was ende besmet.
62:18 Ende niet gode was vercoren.
62:19 Rachel die niewee dar wi toe horen.
62:20 Die scone es ende van gode ghemint.
62:21 Al eist dat men ghescreuen vint.
62:22 Dat lᨡa hadde vele kinder.
62:23 Joseph allene al was hi minder.
62:24 Was scoenre vele ende vroeder.
62:25 Dan iemen onder sine broeder.
62:26 Dus eist al heuet doude wet.
62:27 .x. gheslachte van gode gheset.
62:28 Een niewe ghebod dats karitate.
62:29 Bringhet me volx ter rechter strate.
62:30 Ende lichtelike te gode.
62:31 Dan alle die houde .x. ghebode.
62:32 Sonder karitate dats minne.
62:33 Ne comt niemenne ten hemele jnne.
62:34 Bi tvere ioncwiuen hiere viere wan.
62:35 Neptalim ende eenen die hiet dan.
62:36 Haser ende oec mede gad.
62:37 Dus heuetire .xii. ghehad.
62:38 Van den .xii. wet dat wel.
62:39 Camen .xii. gheslachten van ᨡsrahel.
62:40 Jn dien tiden dat dit ghesciede.
62:41 So verdronken vele liede.
63:1 Met ere louie in achia.
63:2 Doe deucalion ende pirra.
63:3 Vp eenen berch behilden tlijf.
63:4 Do leuede pallas dat starke wijf.
63:5 Die doet sloech eenen gᨡgant.
63:6 Ende dat vule werc oec vant.
63:7 Om die vroescap van haren sinne.
63:8 So maectemer sijnt of eene coninghinne.
63:9 Die doe ter tijt was gheheten godinne.
63:10 Alse ict vernam weet vor waer.
63:11 So woende iacob .xx. iaer.
63:12 Met sinen hoem den quaden laban.
63:13 Daer hi grod goet onderwan.
63:14 Ende dat was labans ondanx sere.
63:15 So ghebod hem onse here.
63:16 Dat hi te lande keren soude.
63:17 Jacob dit endelike doen woude.
63:18 Nam sijn wijf ende sine kinder.
63:19 Ende al dat hi hadde ghinder.
63:20 Ende rachel die stal al gader.
63:21 Dafgode die hadde hare vader.
63:22 Also rumede iacob die stad.
63:23 Ende voer ten berghe van galaad.
63:24 So dat die mare vernam laban.
63:25 Ende volghede na met meneghen man.
63:26 Maer god hiet hem in sinen droem.
63:27 Nv sie wel ende nem dies goem.
63:28 Dattu iacobe sachte sprex an.
63:29 Hier af vervard laban.
63:30 Laban vantene in galaad.
63:31 Ende seide tvi daestu dat.
63:32 Dat tv mi ontfloes sonder bode.
63:33 Ende ontstols mine gode.
63:34 Dinen hoem ende dinen zueer ende dinen werd.
63:35 Jacob sprac ic was vervaerd.
63:36 Dattv mi nemen souds mine wijf.
63:37 Van der dieften sonder blijf.
63:38 Soec dine gode onder mijn allame.
63:39 Jc wilde men hem dat leuen name.
63:40 Ouer so wien so mense vonde.
63:41 Laban sochse langhe stonde.
63:42 Maer al ontstacse hem rachel.
64:1 Daer na suoer si sonder fel.
64:2 Elc andren hulde ende scieden.
64:3 Laban kerde met sinen lieden.
64:4 Ende iacob voer te lande waert.
64:5 Daer ghemoeti an de vaert.
64:6 Jnglen vele met haren scaren.
64:7 Die alle ghereet waren.
64:8 Hem te elpene ieghen esav.
64:9 Van dane sende hi segghic v.
64:10 Bode den broeder omme vrede.
64:11 Die camen weder ter stede.
64:12 Ende seide hi came in goeden moede.
64:13 Met .cccc. man sonder hoede.
64:14 Ende iacob was tehand vervaerd.
64:15 Ende hi bat te gode waerd.
64:16 Here die mi te lande hietes keren.
64:17 Verlosse mi van minen broeder met heren.
64:18 Met minne staue hebbic heden.
64:19 Dese iordane gheleden.
64:20 Ende comen met .ij. scaren.
64:21 Help mi dat ic hem mach ontvaren.
64:22 De staf daer iacob alsic wane.
64:23 Mede leet ouer die iordane.
64:24 Was dat cruce dar men mede.
64:25 Lijt der werelt pijnlichede.
64:26 Die riviere dats die werelt.
64:27 Dar die stroem in kerd ende duerelt.
64:28 Ende emmermeer es onghestade.
64:29 Ne dade dat cruce ende gods ghenade.
64:30 Nieneme ne mochte die werelt liden.
64:31 Dits die staf dar wi toe tiden.
64:32 Jacob ontsac esav.
64:33 Ende wi den duvel fel ende rv.
64:34 Al mochte wi der werelt liden.
64:35 Hi es ons also naer der siden.
64:36 Ne holpe ons god niet in de noet.
64:37 Hi sloeghe ziele ende lijf te doet.
64:38 Maer god die esau maecte sachte.
64:39 Die duinghet den viant met crachte.
64:40 De scaren tiden voren al gaende.
64:41 Ende hi bleef vp den oeuer staende.
64:42 Om te doene sine ghebede.
64:43 Al daer wart hi worstelende mede.
65:1 Jegen eenen ingel mans ghelike.
65:2 Die quetsten in die ziele so bitterlike.
65:3 Dat hem die zenewe verdaerf.
65:4 Sident hebsi so menechwaerf.
65:5 Hi ende alle sine gheslachten.
65:6 Hem ghedaen van zenewen wachten.
65:7 Dat sire noit ne wilden eten.
65:8 Aldus worstelde die deghen vermeten.
65:9 Do verbaerde hare de dagheraet saen.
65:10 Ende die man seide laet mi gaen.
65:11 Jacob sprac dars gheen ontgaen.
65:12 Dune wilt mi benedien saen.
65:13 Dander seide hoe heetstu dan.
65:14 Hi seide iacob. doe sprac die man.
65:15 Jacob sal dine name niet wesen.
65:16 Maer israhel nv meer na desen.
65:17 Hi benediedene in den daghe.
65:18 Ende hiet dat hi niemene ontsaghe.
65:19 No sinen broeder esau.
65:20 Doe seide iacob sech al nv.
65:21 Gode onsen here al openbare.
65:22 Die mi ghetroest heuet van hare.
65:23 Doe rees die zonne een deel betide.
65:24 Ende hi houtene an deene side.
65:25 Dat dede hem des inghels slach.
65:26 Mettien hi esau versach.
65:27 Ende neech hem neder toter erde.
65:28 .vij. waerf met groter werde.
65:29 Esav helsdene teerre stond.
65:30 Ende custene an sinen mond.
65:31 Al weenende vraghedi hem ghinder.
65:32 Wie sijn dese wijf ende dese kinder.
65:33 Do hi wiste dat si sijn waren.
65:34 Custe hise alle sonder sparen.
65:35 Ende keerde weder te sire pord.
65:36 Jacob voer een deel bet vord.
65:37 Wonen teere stad hiet sichem.
65:38 Ende alle sine meisniede met hem.
65:39 Land cohti sinen beesten daer.
65:40 Ende maecte eenen outaer.
65:41 Daer hi gode anebede allene.
65:42 Aldaer ghenas hi van den bene.
66:1 Djna sire dochter luste mettien.
66:2 Dat volc van dien lande besien.
66:3 Ende es in die stad ghegaen.
66:4 Des coninx sone vermindse saen.
66:5 Ende waser met crachte mede.
66:6 Maer die conincg ghinc vter stede.
66:7 Ende bat den vader omme de gone.
66:8 Dat hi sire dochter gaue den sone.
66:9 Selue die sone boet grote miede.
66:10 Hare broedre waren gramme liede.
66:11 Ende seiden wilde hi hem besniden.
66:12 So mochten sire bede tiden.
66:13 Do dede sone ende de vader.
66:14 Hare volc besnieden al gader.
66:15 Hem seluen besneden si.
66:16 Sᨡmoen ende leui.
66:17 Hare broedre camen tien stonden.
66:18 Doet tfolc siec was van den wonden.
66:19 Ende namen hare harnasch an.
66:20 Ende sloegent al doet dat was man.
66:21 Ende namen hare suster dina.
66:22 Dandre broedre camen na.
66:23 Ende roueden alt goet dat was ghinder.
66:24 Doe namen si die wijf ende die kinder.
66:25 Dit was harde leed den vader.
66:26 Ende scalt die broedre bede gadre.
66:27 Omme dat tfolc ouer hem soude claghen.
66:28 Ende bi auenturen belaghen.
66:29 Hem ende de sine ende slaen al doet.
66:30 Vp eene wile cleene ende groet.
66:31 Maer god die trostene wel.
66:32 Ende hietene varen te betel.
66:33 Om dat hi wonen soude daer.
66:34 Ende doen maken eenen outaer.
66:35 Ende hi suuerde sine liede.
66:36 Do hi besach sine meisniede.
66:37 Labans afgode ende van sichem.
66:38 Heuet hi vonden onder hem.
66:39 Die dalf hi al gader onwerde.
66:40 Onder eenen boem diep in derde.
66:41 Sident dar na langhe tijt.
67:1 Ondalfse conincg dauid.
67:2 Ende smalt dat gout teenen ghewerke.
67:3 Of te makene ons heren kerke.
67:4 Jacob die voer in betel.
67:5 Tfolc ne dorste hem niet volghen wel.
67:6 Eenen outaer maecti sonder waen.
67:7 Dar hi die ledre sach staen.
67:8 Jn sinen slape dar te voren.
67:9 Nv meer vord so moghedi horen.
67:10 Dat men bi namen lettel el.
67:11 Anders hiet dan israhel.
67:12 Dar na ghinc in pinen sijn wijf.
67:13 Rachel ende verloes haer lijf.
67:14 Van haren sone beniamin.
67:15 Jacob was droeue in sinen zijn.
67:16 Begrauen was so van hem.
67:17 Jn den wech van bethleem.
67:18 Eenen steen sette hi vp hare graf.
67:19 Die noch niet en es dar af.
67:20 Do voer hi toten vader ᨡsaac.
67:21 Die noch leuede ende sprac.
67:22 Alse hi gheleuet hadde .c. iaer.
67:23 Ende .lxxx. dat es waer.
67:24 Starf hi helechlike ende wel.
67:25 Esav ende ᨡsrahel.
67:26 Doluene in de tviuoudighe aghedochte.
67:27 Die dar te voren abraham cochte.
67:28 Na des vaders doet si bede scieden.
67:29 Die broedre met haren lieden.
67:30 Want si bede rike waren.
67:31 Esav es in edom ghevaren.
67:32 Van hem cam gheslachte hoghe.
67:33 Menich graue menich hertoghe.
67:34 Die ic moet achter laten bliuen.
67:35 Ende moet van iacobe vort bescriuen.
67:36 Dar dat heleghe vlech af cam.
67:37 Dat den duvel die macht benam.
67:38 TJen tiden leesmen dat was.
67:39 Prometheus ende achias.
67:40 Daer die poeten vele of lieghen.
67:41 Diet folc met fauelen bedrieghen.
67:42 Si scriuen prometheus maecte liede.
67:43 Ende hord waer bi dat ghesciede.
68:1 Hi maecte beeldekine die ghinghen.
68:2 Bi sinen sonderlinghen dinghen.
68:3 Hi was diet vingherlijn visierde.
68:4 Ende die hand der mede versierde.
68:5 Mar ᨡserin so was dat sijn.
68:6 Hi hiet draghen tfingherlijn.
68:7 An den vingher dit was sijn raet.
68:8 Die naest den clenen vingher staet.
68:9 Want hi heuet dadre des ghelouet.
68:10 Die al an die herte houet.
68:11 Tien tiden lese wi al dus.
68:12 Was ceres ende tritholomus.
68:13 Die oec es van den godinnen.
68:14 Want soe den grieken leerde coren winnen.
68:15 Tvalef iaer eer ᨡsaac starf.
68:16 Ende eer rachel verdarf.
68:17 So waest dat men ioseph vercochte.
68:18 Nv hord hoe ment dar toe brochte.
68:19 Sine broedre hatene allegader.
68:20 Om dat hi van den vader.
68:21 Lieuer was dan haer ne gheen.
68:22 Dat wel nichdichede sceen.
68:23 De scoenste was vte vercoren.
68:24 Die doe ter werelt was gheboren.
68:25 De vader maecte hem ᨡsrahel.
68:26 Eenen dieren roc ghescepen wel.
68:27 Van dieren werke ten voeten lanc.
68:28 Maer daer die meeste nijt af spranc.
68:29 Dat was van dromen die hi sach.
68:30 Hi tellet den broedren vp eenen dach.
68:31 Hem dochte in dromen teenen stonden.
68:32 Dat si te samene scoue bonden.
68:33 Ende hare scoue den sinen ne gheen.
68:34 Do spraken si fellike der ieghen.
68:35 Soutv danne onse conincg wesen.
68:36 Eenen andren tellet hijt na desen.
68:37 Ende seide den vader daer hi lach.
68:38 Dochte mi dat ic die sonne sach.
68:39 Ende .xi. sternen ende de mane.
68:40 Mi allegader beden ane.
68:41 Sijn vader scaltene ende seide.
69:1 Sullen ic ende dine broedre beide.
69:2 Ende dijn moeder die anebeden.
69:3 Hier af cam vele der nidicheden.
69:4 De broedre laghen in chitem.
69:5 Ende hare beesten doe met hem.
69:6 Jn hare weiden in dien tiden.
69:7 Also daden si langhen siden.
69:8 Joseps riep ᨡsrahel ende seide vare.
69:9 Tinen broedren ende merct hoet staet dare.
69:10 Joseph vantse in dothaim.
69:11 Teersten dat si saghen him.
69:12 Seiden si siet waer die dromer comt.
69:13 Slawine doet ende proef wi wat vromt.
69:14 Dat hi hem an drome hout.
69:15 Werpwine in die cisterne out.
69:16 Ende segghen datten .i. dier verbeet.
69:17 Ruben horet het was hem leet.
69:18 Ende seide hen ware niet goet.
69:19 Storte wi sijn onnosel bloet.
69:20 Mar werpwine leuende in den pit.
69:21 Dit seide ruben. dit.
69:22 [Niet] [van] [rouwen] [doed] [bliuen] [bede.]
69:23 [Doe] [namen] [sine] [bi] [den] [dieren] [clede.]
69:24 [Ende] [dadent] [hem] [af] [ende] [na] [dit.]
69:25 [Worpsine] [leuende] [in] [den] [pit.]
69:26 Die van watre niet ne was nat.
69:27 Ruben. riet.